१२ भदौ , विराटनगर , काठमाण्डौ , एजेन्सी ।
अमेरिकामा बेपत्ता ममता काफ्लेको हत्या अझै रहस्यमय र प्रहरीले शवसहित ठोस प्रमाण नभेटिरहेका बेला अर्की नेपाली चेलीको पनि हत्या भएको छ । सोमबार ह्युस्टनस्थित अपार्टमेन्टमा भोजपुरकी मुना पाण्डेको हत्या भएको हो ।
गोली लागेर मृतअवस्थामा फेला परेकी मुना पाण्डेलाई हत्याराले उनको कोठाभित्रै पसेर गोली हानेको प्रारम्भिक अनुसन्धानले पुष्टि भएको छ । वेष्ट एअरपोर्ट ब्लुभर्डमा रहेको मुनाको अपार्टमेन्टमा उनी आफैँले राखेको सर्भिलेन्स क्यामेराका भिडियो फुटेजहरू प्रहरीले लगिसकेका छन् ।
त्यसले गर्दा मुनाका हत्यारा पत्ता लगाउन सघाउ पुग्ने विश्वास समुदायले गरेको छ । ओछ्यान भरि कट्कटिएको रगत र घटनास्थलमा रगतको दुर्घन्ध आएकोले घटना शनिवारतिरै भएको हुनुपर्ने आशंका सो भिडियो क्लिप लिएका स्थानीय नेपालीले बताएका छन् ।
उनले बताए अनुसार मुनालाई तीनवटा गोली हानिएको थियो। सन् २०२१ मा अध्ययनका लागि अमेरिका पसेकी मुनाले सन् २०२२ को जनवरी देखि हिलक्रफ्टस्थित काठमाण्डुकरी रेष्टुराँमा करिब एक वर्ष काम गरेकी थिइन् ।
सोमबार साँझ घटनास्थलमा पुगेका र अनुसन्धान प्रक्रियामा अधिकारीहरुसँग सम्पर्कमा रहेका स्थानीय नेपाली संस्था नेप्लिज एशोसियसन अफ ह्युस्टनका पूर्व अध्यक्ष डा. विष्णु नेपालका अनुसार पोस्टमार्टम सकिएपछि मुनाको शव स्थानीय फ्यूनरल होममा आउने र त्यसपछि परिवारको समन्वयमा एनएएच लगायत स्थानीय संघसंस्थाको सहयोगबाट अन्त्येष्टि गरिनेछ ।
दिवंगत मुनाकी नेपालमा रहेकी आमाले समेत छोरीको अन्तिम संस्कारमा भए पनि घटना भएको ह्युस्टन आउन चाहेको भन्ने सूचना आएकाले एनएएचकै सक्रियतामा ‘इन्सिडेण्ट’ रिपोर्ट पनि पठाइसकिएको डा. नेपालले बताएका छन् ।
घटनास्थलमा उपलब्ध प्रमाणहरु, मुनाले सामाजिक सञ्जालमा र आमासँग सेयर गरेका तस्बिर, भिडियो लगायतका सूचनाका आधारमा प्रहरीले हत्यारा पत्ता लगाउने ह्युस्टनका नेपाली समुदायले विश्वास गरेको समाचारमा जनाइएको छ ।
यसबीच ममता काफ्ले बेपत्ता भएको एक महिना पुगेको छ । एक महिनायता उनलाई न कसैले देखेको छ, न उनको अवस्थाबारे कसैलाई जानकारी छ । अमेरिकास्थित भर्जिनियाको मनसास पार्क प्रहरीले उनको खोजी त गरिरहेको छ, तर ठोस उपलब्धि हासिल गर्न सकेको छैन् ।
उनका श्रीमान् नरेश भट्टमाथि प्रर्याप्त प्रमाणको अभावमा शव व्यवस्थापन गरेको आरोप लगाएपनि उनैले हत्या गरेको हुन् सक्ने आशंका मात्रै प्रहरीले गरेको छ । अगस्ट २२ मा नरेशमाथि ममताको शव लुकाएको अभियोग लगाइएको थियो ।
उनी २३ अगस्ट र २६ अगस्ट गरी दुईपटक प्रिन्स विलियम अदालतमा उपस्थित भइसकेका छन् । तर, नरेशले आफूमाथिको आरोप निरन्तर अस्वीकार गर्दै आएका छन् । बरु आफैँ पीडित बनेको उनको दाबी छ ।
अर्कोतर्फ अनुसन्धान अधिकारीहरूले हत्याको संकेत गर्ने केही प्रमाणहरू फेला पारे पनि ठोस प्रमाण भेटाउन सकेका छैनन् । मानासस पार्कका प्रहरी प्रमुख मारियो लुगोले आफूहरूले सक्रियरूपमा ममताको खोजी गरिरहेको बताएका छन् ।
उनले आफूहरूले थप प्रमाणहरू फेला पारेको पनि बताएका छन् । तर, नयाँ प्रमाणबारे खोल्न नमिल्ने बताएका छन् । मानासस पार्कका प्रहरी प्रमुखले आफूहरूले एफबीआई, भन्सार सीमा गस्तीको टोली र जासुसी निकायसँग मिलेर अनुसन्धान गरिरहेको बताएका छन् ।
उनले आफूलाई अहिलेसम्म ममता जीवित रहेको विश्वासन नभएको पनि बताए । “भन्न त मन छैन, तर मलाई ममता जीवित रहेको लाग्दैन,“ उनले भनेका छन् । नरेशलाई हिरासतमा राखेर अनुशन्धान गर्न अक्टोबरसम्मको समय पाएको प्रहरी फेरि ममता र नरेशको घर पुगेको छ ।
उनीहरूले ममतालाई के भयो भन्ने थप प्रमाणहरू खोज्न अर्को खोजी वारेन्ट लिएर घरमा पुगेको स्थानीय संचारमाध्यामहरुले उल्लेख गरेका छन् । प्रहरीले घरमा करिब तीन घण्टा अनुसन्धान गरेको थियो ।
छिमेकीहरूले उनीहरूलाई बेसमेन्ट क्षेत्रको वरिपरि कुकुर प्रयोग गरेको, पेपरको ठूलो रोल ल्याएको र अग्निनियन्त्रकहरूले भर्याङ ल्याएको देखेको बताएका छन् । यसअघि, मंगलबार अदालतको सुनुवाइका क्रममा नरेशले ममता बेपत्ता हुनु केही महिना अगाडि ’श्रीमतीको मृत्युपछि विवाह गर्न कति समय लाग्छ’ भनेर गुगलमा खोजेको पाइएको तथ्य बाहिरिएको थियो ।
अदालतमा अभियोजकहरूले नरेशले चान्टिलीको वालमार्टबाट तीनवटा चक्कु खरिद गरेको प्रमाण आफूहरूसँग रहेको पनि बताएका छन् । गत हप्तामात्र अनुसन्धान अधिकारीहरूले उनको उत्तरी भर्जिनियाको घरमा खानतलासी गर्दा ममताको हत्या गरिएको संकेत भेटाएका थिए ।
अदालतमा अभियोजनकर्ता सारा सामीले मास्टर बेडरुम र बाथरुममा देखिएको रगतको मात्राले ममता अब जीवित नरहेको संकेत गर्ने बताएकी थिइन् । तर, परीक्षणबाट उनीहरूको घरमा भेटिएको रगत ममताको हो÷होइन भन्ने पुष्टि हुन सकेको छैन ।
तर, प्रारम्भिक परीक्षणमा मानव रगत भएको निष्कर्ष निकालिएको छ । ममता आफ्ना साथीहरू र परिवारसँग नियमितरूपमा सम्पर्कमै रहन्थिन् । उनी सामाजिक सञ्जालमा पनि उत्तिकै सक्रिय थिइन् । तर, जुलाई २९ मा उनको फोन बन्द भयो । त्यसपछि अन्तिमपटक अगस्ट १ मा उनको फोन लोकेट गरिएको थियो ।
