१४ भदौ, विराटनगर ।
पाँचथरको फालेलुङ गाउँपालिकामा बिहीबार विस्फोटमा परी गम्भीर घाइते भएका दुई बालबालिकाको मृत्यु भएको छ ।
फालेलुङ-५ मा भएको सो विस्फवटमा प्राङवुङ डाडागाउँ टोलका ११ वर्षीय दिप्सन साँवा र उनकी दुई वर्षीया बहिनी प्रिन्सा साँवाको मृत्यु भएको हो ।
हिजो दिउँसो ३ बजेतिर भएको विस्फोटमा घाइते भएका उनीहरूलाई उपचारार्थ पाँचथर अस्पताल पुर्याइएको थियो । तर, त्यहाँ उपचार सम्भव नभएपछि दिप्सन र प्रिन्सालाई तत्काल झापाका लागि रेफर गरिएकोमा प्रिन्साको राति १० बजे इलाम पुर्याउँदा बाटोमै मृत्यु भएको थियो ।
दिप्सनको भने राति १ बजे झापाको बिर्तामोडस्थित बिएन्डसी अस्पतालमा मृत्यु भएको प्रहरीले जनाएको छ । विस्फोटमा परी स्थानीय ज्ञानबहादुर राईका ९ वर्षीय छोरा पवन राई घाइते भएका छन् । उनको उपचार भइरहेको प्रहरीले जनाएको छ ।दिउँसो तीन बजे स्थानीय आइतराज केरुङको घरमा विस्फोट भएको थियो । होम मेड ग्रिनेट पड्केर घाइते भएको हुनसक्ने जिल्ला प्रहरी कार्यालय पाँचथरले जनाएको छ । बम कहिले र कसले राख्यो भन्ने नखुलेकाले अनुसन्धान भइरहेको प्रहरीले जनाएको छ ।
बम विस्फोट भएको घरका धनी आइतराज पूर्वमाओवादी हुन् । उक्त घर द्वन्द्वकालमा सेल्टरको रूपमा प्रयोग भएको स्थानीयले जनाएका छन् । त्यो घरमा अहिले ज्ञानबहादुर राईको परिवार बस्दै आएको छ । बम द्वन्द्वकालमा लुकाइएको हुनसक्ने स्थानीयले आशंका गरेका छन् ।
