१४ भदौ , काठमाण्डौ ।
काभ्रेको पनौती माइती र कञ्चनपुर घर भई अमेरिकाको भर्जिनिया बस्दै आएकी ममता काफ्ले भट्टलाई आफन्तजनले खोज्न थालेको एक महिना बितिसक्यो । एक वर्षे बालिकाकी आमा र पेसाले नर्स रहेकी ममतालाई अमेरिकन प्रहरीले पनि पछिल्लो केही सातायता खोजिरहेको छ । तर, उनलाई न परिवार–आफन्तजनले भेट्न सकेका छन्, न त प्रहरीले नै फेला पारेको छ ।
ममताको वीभत्स हत्या गरेर शव लुकाएको आरोपमा प्रहरीले उनका पति नरेश भट्टमाथि अदालतमा मुद्दा चलाएर अनुसन्धान प्रक्रियालाई तीव्र पारेको छ । घरभित्रै मारेर शव बाहिर लुकाएको भन्दै ३७ वर्षीय भट्टलाई हिरासतमा राखेर ममतालाई खोजिरहेको छ । ममता ज्युँदो भेटिने सम्भावना त्यागिसकेको प्रहरीले मृतावस्थामा भए उनको शव फेला पार्न अनेक प्रयास गरिरहेको छ ।
मनासस पार्क प्रहरीका प्रमुख मारियो लुगोले मंगलबार रिपोर्टरसँगको कुराकानीमा ममताको जीवित फेला पार्ने सम्भावना सकिएको बताएका छन् । तथापि, खोजी कार्यलाई टुंगोमै पु¥याएर छोड्ने उनको भनाइ छ । बिहीबार बिहान भर्जिनिया अदालतमा प्रहरीले भट्टलाई उपस्थित गराएको थियो, जहाँ उनले हत्या अस्वीकार गर्दै बरु आफू उल्टै पीडित रहेको पटक–पटक दोहो¥याएका थिए ।
सिएनएनका अनुसार कोर्टले ममता हत्या प्रकरण ग्रान्ड ज्युरीलाई नै सुम्पिने निर्णय लिएको छ, अब उसले अभियोग जारी गर्ने सम्भावित कारण भए–नभएको भनेर निर्क्यौल गर्ने छ । ममता काफ्लेको शव लुकाएको मुद्दामा पक्राउ परेका श्रीमान् नरेश भट्टको मोशन अदालतले स्वीकार गरेको छ । अक्टोबर २४ मा हुने प्रारम्भिक सुनुवाइ छुट दिनका लागि नरेशले अदालतमा मोशन दायर गरेका थिए ।
बिहिबार बिहान ९ बजे भएको सुनुवाइमा अभियोजकहरूले नरेशको प्रस्तावमा विरोध नगरेपछि मोशन स्वीकृत गरिएको हो । नरेशलाई सुनुवाईका क्रममा अदालतमा उपस्थित गराइएको थियो । नरेशको डिफेन्स टोलीले अदालती प्रक्रियालाई गति दिनका लागि प्रारम्भिक सुनुवाइमा छुटको प्रस्ताव गरेको हो । मोशन स्वीकृत भएकाले अब अक्टोबर २४ मा हुने प्रारम्भिक सुनुवाई रद्द भएको छ ।
प्रारम्भिक सुनुवाई रद्द गर्दा अभियोजकहरुलाई थप प्रमाणहरु जुटाउनका लागि कम समय हुनेछ । नरेशलाई विना धरौटी हिराशतमा राखिएकाले नरेशको डिफेन्स टोलीले यसलाई रद्द गराउन चाहेका थिए । प्रारम्भिक सुनुवाइले मुद्दामा थप ध्यानाकर्षण र चर्चा समेत हुने गर्छ । सम्भवत नरेशको डिफेन्स टिम यसलाई कम गराउने रणनीतिमा रहेको छ । मुद्दा अगाडि सर्दा अभियोजन पक्षमाथि थप दवाव श्रृजना हुनसक्छ ।
प्रहरीका अनुसार गत जुलाई २७ मा ममता मनाससस्थित युभिए हेल्थ प्रिन्स विलियम मेडिकल सेन्टरमा देखिएकी थिइन् । उनले त्यहाँको सर्जिकल युनिटमा रजिस्टर्ड नर्सका रूपमा काम गर्दै आएकी थिइन् । जुलाई २८ मा ममताले आफ्नी साथीसँग कुरा गरेकी थिइन् । सोही दिन उनले आफ्नो टिकटक अकाउन्टमा आफू र छोरीको भिडियो पोस्ट गरेकी थिइन् । ममता काफ्ले हप्ताको दुई दिन उक्त अस्पतालमा काम गर्थिन् ।
उनले अगस्ट १ र २ मा अस्पतालमा ड्युटी गर्नुपर्ने तालिका थियो । तर, उनी काममा पनि गइनन् र फोन पनि गरिनन् । ममता हराएपछि अगस्ट २ मा प्रहरी मनाससस्थित उनीहरूको घर पुगेको थियो । ममता हराएकोबारे प्रहरीले नरेशलाई सोध्दा उनले पत्नी हराएकै बेला रिपोर्ट गर्न नचाहेको सुनाएका थिए । त्यसको तीन दिनपछि ममता हराएको निवेदन पेस गरेका उनले पछिल्लोपटक ३१ जुलाईमा सँगै टेबलमा बसेर खाना खाएपछि आफूले उनी सम्पर्कमा नरहेको जनाएका थिए ।
नरेश पूर्व फायरफ्याक्स कन्ट्री प्रहरी हुन् र पूर्व अमेरिकन आर्मी पनि हुन् । त्यसपछि ५–८ अगस्टमा नरेशले अनुसन्धानमा प्रहरीलाई सघाएका थिए । ममतालाई खोज्ने साथी–आफन्तको भिडमा बसेर मिडियामार्फत् चाँडै फर्क भनेर सन्देश समेत पठाए ।
सन्देशमा उनले भनेका छन्, ‘हे ! तिमी फर्किदेऊ । म र छोरी तिमीलाई प्रत्येक सेकेन्ड, प्रतिमिनेट पर्खिरहेका छौं । यदि, तिमीले सुनिरहेकी छौं भने हामी यहाँ तिमीलाई पर्खिरहेका छौं । हामी तिमीलाई चाहन्छौं ।’
त्यसपछि विस्तारै आशंको घेरामा पर्दै गएका उनलाई प्रहरीले ममताको शव व्यवस्थापन गरेको अभियोगमा पक्राउ गरेर अनुसन्धान गरिरहेको छ । यता ममताका परिवारका २ सदस्य न्याय माग्दै अमेरिका पुगेका छन् । एक वर्षीया छोरीको जिम्मेवारी भने अमेरिका पुगेका उनकी हजुर आमा र मामाले लिएका छन् ।
