१५ भदौ, विराटनगर ।
सामाजिक सञ्जाल ‘एक्स’ (पूर्वट्विटर) का मालिक एलन मस्कले ब्राजिलमा अभिव्यक्ति स्वतन्त्रतामाथि बन्देज लगाउने प्रयत्न भइरहेको प्रतिक्रिया दिएका छन् । ब्राजिलले ‘एक्स’ लाई पूर्ण रूपमा प्रतिबन्ध लगाएपछि खर्बपति ब्यापारी मस्कको यस्तो प्रतिक्रिया आएको हो ।
ब्राजिलले एक्समाथि प्रतिबन्ध लगाएसँगै एलन मस्कले अभिव्यक्ति स्वतन्त्रता लोकतन्त्रको आधार रहेको र राजनीतिक दबाबका कारण सर्वोच्चलले त्यसमाथि बन्देज लगाएको प्रतिक्रिया दिएका छन् ।
साथै, भिपिएन प्रयोग गरेर एक्स चलाएर प्रयोगकर्ताले प्रतिदिन नौ हजार डलरसम्म तिर्नुपर्ने नियम अदालतले ल्याएपछि मस्क झनै रुष्ट बनेका छन् ।
ब्राजिलको सर्वोच्च संघीय अदालतका मन्त्री अलेक्जान्डर डे मोरेसप्रति लक्षित हुँदै उनले भनेका छन्, ‘ब्राजिलका जनताले उनका अपराधबारे थाहा पाएरै छोड्ने छन्, उनले जतिसुकै रोक्ने कोसिस गरेको भए पनि ।’
ब्राजिलको सर्वोच्च अदालतको फैसलापछि एक्सलाई प्रतिबन्ध लगाइएको हो । कम्पनीले तोकिएको समयमा ब्राजिलमा आफ्नो कानूनी प्रतिनिधि नियुक्त नगरेको भन्दै त्यहाँको सर्वोच्च अदालतले एक्समा प्रतिबन्ध लगाउन आदेश दिएको हो ।
अदालतका सबै आदेशहरू पालना नगरेसम्म र तोकिएको जरिवाना नतिरेसम्म एक्समाथि प्रतिबन्ध लगाइएको मन्त्री मोरेसले बताएका छन् ।
‘एक्स’लाई म्यादभन्दा पहिले ब्राजिलमा आफ्नो कानुनी प्रतिनिधि नियुक्त गर्न भने पनि त्यसो गर्न असफल भएपछि अदालतले तत्कालका लागि पूर्ण रूपमा बन्द आदेश दिएको अन्तर्राष्ट्रिय मिडियाहरूले जनाएका छन् ।
एक्सले जरिवानावापत करिब ३० लाख अमेरिकी डलर तिर्नुपर्ने जनाइएको छ । अदालतले गुगललाई समेत एक्सको एप्लिकेसनलाई आइफोन अपरेटिङ सिस्टमको स्टोर र एन्ड्रोइडको स्टोरबाट पाँच दिनभित्र हटाउने आदेश दिएको छ ।
