१६ भदौ, विराटनगर ।
अमेरिकाको टेक्सास राज्यस्थित ह्युस्टन सहरमा गोली लागेर ज्यान गुमाएकी मुना पाण्डे र हत्या आरोपमा पक्राउ परेका बबिसिंह शाहबीच ‘सुगर ड्याडी’ नामक वेबसाइटमार्फत चिनजान भएको आशंका गरिएको छ । २१ वर्षीया मुनाको हत्या प्रकरणमा अनुसन्धान गरिरहेका प्रहरी अधिकृतहरूले डेटिङ वेबसाइटमध्येको प्रख्यात ‘सुगर ड्याडी’ मार्फत् चिनापरिचय भएको हुन सक्ने औंल्याएका हुन् ।
मुख्य घर भोजपुर भई काठमाडौं बस्दै आएकी मुना अध्ययन सिलसिलामा अमेरिका पुगेको तीन वर्षपछि हत्याको सिकार भएकी थिइन् । अगस्ट २६ तारिखमा मुना आफ्नै कोठामा मृतावस्थामा फेला परेकी थिइन् । अपार्टमेन्टमा एक्लै बस्ने गरेकी मुनाले आफूलाई कसैले नियमित पछ्याइरहेको आशंकामा सिसिटिभी पनि जडान गरेको ह्युस्टन टु क्लिकले लेखेको छ । सोही सिसिटिभी फुटेजका आधारमा भारतीय मुलका प्रौड उमेरका नागरिक शाहलाई त्रफाउ गरेर अनुसन्धान गरिरहेको छ ।
५१ वर्षीय शाहले प्रहार गरेको तीन राउन्ड गोली लागेर मुनाको मृत्यु भएको ह्युस्टन प्रहरी अधिकारीहरूको दाबी छ । हत्या भएको रातको भिडियो फुटेजमा पेस्तोल बोकेर पुगेका बबीसिंहले मुनालाई आफ्नो अपार्टमेन्टको ढोका खोल्न बारम्बार भनेका थिए । पाण्डेले ‘ह्वाट आर यू गोइङ टु डु (के गर्न लागेको) ?’ भन्दै सोधेकी थिइन् । त्यसपछि बबीसिंहले मुनालाई स्थानीय समयअनुसार ८ बजेर ४१ मिनेटमा कोठाभित्र धेकेलेर ढोका बन्द गरेको देखिएको छ ।
त्यसपछि मुनाको छाती र गर्धनमा गोली प्रहार गरेका शाह उनको पर्स लिएर त्यहाँबाट हिँडेको प्रहरीको आशंका छ । यसले पनि प्रहरीले लुटपाटका लागि मुनाको हत्या भएको हो कि भन्ने अड्कल काटेको थियो । अपार्टमेन्टका कर्मचारीले जानकारी गराएपछि मुनाको कोठा पुगेको प्रहरीले उनलाई मृतावस्थामा फेला पारेको थियो । रगत कटकएिको अवस्थामा शव फेला पारेपछि केही दिनअघि नै मुनाको हत्या भएको प्रहरीले अनुमान गरेको थियो ।अनुसन्धानमा जुटेको प्रहरीले मुना र बबिसिंहले सुगरड्याडीमार्फत् चिनाजानी भएको हो कि भन्ने अनुमानमा पुगेको ह्युस्टन टु क्लिक मिडियाले जनाएको छ । बबिसिंह पक्राउ परेपछि उनलाई बारम्बार फोन गर्ने दुईवटा फोनमा प्रहरीले फोन गरेको थियो । एउटा फोन त्यही रेस्टुरेन्टको थियो, जहाँ बबिसिंह प्रायः जानेगरेका थिए । उक्त कलरले बबिसिंहको लाइसेन्स र फोन नम्बर उपलब्ध गराएका थिए, जसबाट उनी ५१ वर्षीय भारतीय मुलका नागरिक भन्ने पत्ता लगाएर प्रहरीले पक्राउ गरेको थियो ।
दोस्रो फोनमा भने बबिसिंहसँग सुगर ड्याडीमार्फत् चिनाजानी गरेका एक महिलाको थियो । ती महिलाले बबिसिंह बबी शाह नाममा उक्त वेबसाइटमा सक्रिय रहेको जनाउँदै उनले महिलाका लागि केही सामानहरू खरिद गर्नेगरेको सुनाएकी थिइन् । तर, त्यी सामग्रीहरू मुनाकै लागि थिए त ? वा मुना पनि उक्त वेबसाइटको प्रयोगकर्ता थिइन् त ? यी विषयमा भने प्रहरीले अनुसन्धान गरिरहेको बताइएको छ ।
हत्या भएको राति पनि मुनाले जुत्ताको बट्टा, सपिङ झोला, कालो ज्याकेट र कालो पर्ससहितका सामान बोकेको देखिन्छ । उक्त सामानमध्ये मुनाले बोकेको पर्स बबिसिंहले लिएर हिँडेका सिसिटिभी फुटेजमा देखिएको छ । मुनालाई ‘सपिङ’ गराइदिएपछि भएको विवादले गर्दा बबिसिंहले उनको हत्या गरेको हुन सक्ने भन्दै प्रहरीले उक्त कोणबाट अनुसन्धान गरिरहेको बताइएको छ ।
प्रहरीले सिसिटिभी क्यामेराका तस्बिरहरू सार्वजनिक गरेको केही घण्टामै बबिसिंहलाई पक्राउ गरेको थियो । ह्युस्टन प्रहरीले बुधबार साँझ बबिसिंहलाई पक्राउ गरी अदालतमा बुझाएर अनुसन्धानलाई तीव्र पारेको छ । तथापि, बबिसिंहले घटनाबारे थप केही नबताएको अन्तर्राष्ट्रिय सञ्चारमाध्यमले जनाएका छन् । अब, मुना हत्या प्रकरणको सुनुवाइ मंगलबार बिहान स्थानीय समयअनुसार ९ बजे हुने बताइएको छ ।
