१८ भदौ, काठमाडौं ।
काठमाडौं महानगरपालिकाका प्रमुद बालेन्द्र शाह (बालेन) को कार्यशैलीमाथि उपप्रमुख सुनिता डंगोलले प्रश्न उठाएकी छन् । मंगलबार बसेको कार्यपालिकाको बैठकमा उपमेयर डंगोलले बालेनको कार्यशैलीमाथि प्रश्न तेर्स्याएकी हुन् ।
काठमाडौंका नदी किनारका दुवैतर्फ थप २० मिटरको मापदण्ड कायम गर्ने सर्वोच्च अदालतको फैसलापछि महानगरले जारी गरेको सूचनालाई लिएर डंगोल बालेनसँग ‘फायर’ भएकी छन् । सर्वोच्चले हालै मात्र नदी किनारको दुवैतर्फ थप २०-२० मिटरको मापदण्ड तोक्ने फैसला गरेको थियो । लगत्तै महानगरले सूचना निकालेर भवन निर्माण रोकेको छ ।
अदालतको फैसला पालना गर्नु सबैको दायित्व भए पनि फैसला कसरी कार्यान्वयन गर्छौं भन्ने महत्त्वपूर्ण हुने डंगोलको धारणा छ । उनले भनिन्, ‘महानगरले जारी गरेको सूचनामा प्रमुखस्तरीय निर्णयअनुसार सूचना प्रकाशित गरिएको छ भन्ने लेखिएको छ । यो सबै जनाको निर्णय हो कि होइन ?’
स-सना विषयलाई बोर्डमा ल्याउने गरिएको भए पनि यति संवेदनशील विषयमा बोर्ड बैठक नराखेको सुनिताको दुःखेसो छ । उनले भनिन्, ‘मेयरस्तरीय निर्णय भनेर सूचना जाने । हामी जनप्रतिनिधिले सूचनाबाटै सुसूचित हुने राम्रो पद्धति राम्रो होइन ।’अदालतमा गरेको निर्णय सदैब जनताको हितमा हुन्छ भन्ने पनि नभएकाले पुनरावलोकनमा जाने विषयमा छलफल गर्नुपर्नेमा आफू रहेको उनको भनाइ छ । आफूहरूसँग छलफल नै नगरेकाले सूचनाको अपनत्व लिन नसकिएको उपमेयर डंगोलले बताइन् ।
तर, उपमेयरको प्रश्न सुनेपछि मेयर बालेन जवाफमा ‘बैठक सकियो धन्यवाद’ भन्दै हिँडे ।
