१८ भदौ, विराटनगर ।
नेकपा (माओवादी केन्द्र)का सांसद अमनलाल मोदीले मंगलबार प्रतिनिधिसभाको बैठकमा अनौंठो प्रस्ताव राखेका छन् । माओवादी अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’लाई जनक भनिनुपर्ने मोदीको माग छ ।
साथै मोदीले शान्तिका लागि अथक प्रयास गरेकाले प्रचण्डलाई नोबेल पुरस्कारका लागि प्रस्ताव गर्न माग गरेका छन् । उनले भने, ‘जनयुद्ध लडेका पार्टीका कमान्डर प्रचण्ड लोकतन्त्र, नागरिक र समावेशी समानुपातिकको पक्षमा लड्नुभयो। आन्दोलनको नेतृत्वकर्ता भएका कारणले रामजस्तै उहाँलाई जनक भनिनुपर्छ । शान्तिका लागि अथक प्रयास गर्नुभएको कारणले उहाँलाई नोबेल पुरस्कारको प्रस्ताव गर्नुपर्छ र दिनुपर्छ भन्ने माग राख्दछु।’
मोदीले हिंसाको विषय उठाएर शान्ति प्रक्रियालाई खलल नपुर्याउन आग्रह गर्दै विभिन्न कालखण्डमा भएका घटनालाई हिंसा भन्ने भनी प्रश्न गरे । ‘रामायणमा राम र रावणको युद्ध भयो। रावणको मृत्यु भयो। लंका जल्यो। राम र रावणको युद्ध नभएर हिंसा हो त ?,’ उनको भनाइ छ ।
