१९ भदौ, विराटनगर ।
अमेरिकाको टेक्सासस्थित ह्युस्टन सहरमा गोली प्रहारबाट ज्यान गुमाएकी मुना पाण्डेको हत्या आरोपमा पक्राउ परेका भारतीय मुलका नागरिक बबिसिंह शाहलाई अदालतमा उपस्थित गराइएको छ । ‘बबी शाह’ नामले परिचित ५१ वर्षीय उनलाई मंगलबार पहिलोपटक अदलातमा उपस्थित गराइएको थियो ।
जेलमा लगाउने पहेँलो कपडामा कानुनी कठघरामा उभिएका उनीमाथि २१ वर्षीया नेपाली विद्यार्थी मुना पाण्डेको हत्या गरेको आरोप छ । गत अगस्ट २४ (भदौ ८) मा अपार्टमेन्टभित्रै प्रवेश गरी छातीमा दुई र गर्धनमा एउटा गरी तीनवटा गोली प्रहार गरी मुनाको हत्या गरेको आरोपमा अमेरिकी प्रहरीले शाहलाई पक्राउ गरेको थियो ।
मुनाको शव फेला पारेको दुई दिनपछि सिसिटिभी फुटेजका आधारमा पक्राउ परेका शाहलाई मंगलबार ह्युस्टनस्थित ह्यारिस काउन्टी क्रिमिनल कोर्टहाउसमा भएको सुनवाइमा उपस्थित गराइएको थियो । उनलाई उपस्थित गराइएको ‘कोर्टरुम’ मा मृतक पाण्डेका पारिवारिक सदस्य र साथीहरू पनि उपस्थित थिए ।
अमेरिकी कलेज पढ्ने नेपालका केही विद्यार्थी र ह्युस्टन नपाली संघकी उपाध्यक्ष ड्रोना गौतमसहित केही प्रतिनिधिको पनि कोर्टरुममा उपस्थिति थियो । जहाँ, अभियुक्त शाहलाई मुनाका पारिवारिक सदस्यहरू रुँदै गरेको सुन्न सकिन्थ्यो भने गौतम मुनाका लागि न्याय माग्दै प्राथर्ना गरिरहेकी थिइन् ।
‘ऊ (शाह) अझै पनि दुःखी छैन, मलाई थाहा छैन किन हो ?,’ शाहप्रति लक्षित हुँदै गौतमले भनिन्, ‘यो वास्तवमै परिवारका लागि दुःखको एउटा पक्ष हो । म सबैप्रति धन्यवाद दिन चाहन्छु, जसले मुना हत्या प्रकरणमा र मुनाकी आमालाई सहयोग गर्यो ।’
गौतमका अनुसार मृतक मुनाकी आमा अनिता पाण्डेलाई नेपालबाट ह्युस्टन सहर पुग्न भिसा मिलेको छ । मंगलबार मात्र भिसा पाएकी मुनाकी आमा यसै साता ह्युस्टन पुग्ने छिन् । उनी पुगेपछि मुनाको अनत्येष्टि गरिने बताइएको छ । अहिले उनको शव फ्युनरल हाउमा छ ।
क्लिकटुह्युस्टनडटकम मंगलबार नै शाहका अभियोजक र प्रतिरक्षाका वकिलले केसका बारेमा बोलेका थिए । मुख्य अभियोजक रेबिका मार्सलले शाह समाजका लागि नै खतरा भएका कारण जमानतमा छोड्न नहुने सुनाइन् ।
शाहका वकिल एटोर्नी विल्भिन जे कार्टरले भने शाह धार्मिक व्यक्ति भएको उल्लेख गर्दै उनी शतप्रतिशत निर्दोष रहेको दाबी गरे । शाह शिक्षित व्यक्ति भएको उल्लेख गर्दै जे कार्टरले उनी बाल्यवस्थादेखि नै अमेरिका बस्दै आएको र प्रतिष्ठित कम्पनीमा भाइस प्रेसिडेन्ट भएर काम गरिरहेको बताए ।
पक्ष–विपक्षको कुरा सुनेर शाहलाई तीन महिना थुनामा राखेर अनुसन्धान गर्न अनुमति दिएको थियो । साथै, ‘क्यापिटल मर्डर’ अभियोगमा शाहलाई अदालतले जमानतमा छोड्न अस्वीकार गरेको थियो । सुनवाइमा सिंहका वकिलले जमानतको माग गरेका थिए । तर, न्यायाधीशले उनीविरुद्ध यथेष्ट प्रमाणहरू भएका कारण माग अस्वीकार गरे ।
शाह मुनाको अपार्टमेन्टभित्र पसेको र हतियारसहित बाहिरिएको सिसिटिभी फुटेज सबैभन्दा बलियो प्रमाणका रूपमा पेश गरिएको थियो । त्यसबाहेक शाह हत्याका बखत लगाएकै लुगा लगाएर डुलिरहँदा पक्राउ परेका थिए । उनको कारबाट हतियारसमेत बरामद भएको थियो । रगतको टाटा लागेको उनको लुगा पनि अदालतमा पेस भएको थियो ।
सिंहलाई अवैध हतियार बोकेको र हत्या गरेको दुईवटा अभियोग छन् । अवैध हतियारको सुनवाइमा पनि उनलाई जमानत मिलेको थिएन । यदि हत्या अभियोग प्रमाणित भएमा उनले आजीवन जेल सजाय भोग्नुपर्ने छ ।
