१९ भदौ, विराटनगर ।
कोशी प्रदेशमा नेकपा माओवादी केन्द्रबाट सरकारमा सहभागी भएका मन्त्रीहरूले राजीनामा दिएपछि रिक्त रहेका मन्त्रालयहरू अझै मन्त्रीविहीन छन् ।
केन्द्रमा नेपाली कांग्रेस र नेकपा (एमाले) बीच सत्ता समीकरण बनेपछि माओवादीका मन्त्रीहरूले मुख्यमन्त्री हिक्मतकुमार कार्कीलाई गत साउन ११ गते राजीनामा बुझाएका थिए ।
माओवादीबाट प्रदेश सरकारमा गणेशप्रसाद उप्रेती भौतिक पूर्वाधार विकास, राजेन्द्र कार्की स्वास्थ्य, नारायणबहादुर मगर पर्यटन, वन तथा वातावरण र बन्दना झाँगर पर्यटन, वन तथा वातावरण राज्यमन्त्री थिए ।
उनीहरूको राजीनामापछि रिक्त रहेका चार मन्त्रालय अझै मन्त्रीविहीन छन् । करिब डेढ महिना बितिसक्दा पनि मन्त्रीमण्डलले पूर्णता पाउन सकेको छैन । सत्ता साझेदार दल कांग्रेसले मन्त्रीहरूको नाम छिनोफानो गर्न नसक्दा मन्त्रिपरिषद् विस्तार हुन नसकेको हो ।मुख्यमन्त्री हिक्मतकुमार कार्कीले मन्त्रिपरिषद् विस्तार गर्न अझ केही दिन लाग्ने बताएका छन् । उनले तिजपछि मात्रै सरकार विस्तार हुने जानकारी दिए । कांग्रेसलाई सरकार विस्तारको लागि गति बढाउन आग्रह गरे ।
‘कांग्रेसको हिँडाइ विस्तारै भयो, गति बढाउनुहोस्,’ उनले भने ।
मुख्यमन्त्री कार्कीले कांग्रेसकै आफ्नो कारणले सरकार विस्तारमा ढिलाइ भएको बताउँदै अब चाँडै मन्त्रिपरिषद् बिस्तार हुने सुनाए । उनले सरकार विस्तारमा ढिलाइ हुँदा सरकारको काममा पनि असर परेको बताउँदै जति चाँडो सरकार विस्तार हुन्छ त्यति सरकारले गति लिने बताए ।
अहिलेको सरकार शासकीय सुधारतर्फ लागेको र विकासका योजनाहरूलाई तीव्र गति दिइने उनको भनाइ छ । फरक प्रसंगमा पत्रकारहरूको प्रश्नको जवाफ दिँदै मुख्यमन्त्री कार्कीले सरकारका बारेमा नमिठो बोल्यो भनेर कसैसँग लाप्पा खेल्न जान नहुने टिप्पणी गरे ।
‘अमर्यादित बोल्ने, तथ्यबिना बोल्नेसँग केही गर्न सकिँदैन । हामी हाम्रो काम विश्वासिलो ढंगले गरेर अगाडि बढ्छौँ । कसैले नमिठो बोल्यो भन्दैमा लाप्पा खेल्न जाने कुरा भएन,’ उनले भने ।
सरकार गतिशील र व्यवस्थित ढंगले अगाडि बढिसकेको सन्दर्भमा कसले के भन्यो त्यतातिर जाने नभइ काम गर्न लागिपर्ने उनले बताए ।
