२० भदौ, विराटनगर ।
चौथौ संस्करणको युरोपियन नेसन्स लिगका खेलहरू आज (बिहीबार) बाट सुरु हुँदै छन् । युरोपका ५४ सदस्य राष्ट्रहरूले प्रतिस्पर्धा गर्ने नेसन्स लिगअन्तर्गत समूह चरणका खेलहरू सुरु हुन लागेका हुन् ।
युरोपियन फुटबल महासंघको आयोजना हुने प्रतियोगिताको पहिलो र दोस्रो गरी दुई चरणको खेल यो महिनामा हुने छ भने तेस्रो र चौथौ अक्टोबरमा अनि पाँचौं र छैंटौ चरणका खेल नोभेम्बरमा हुने छ ।
आज पहिलो संस्करणको नेसन्स लिगको विजेता पोर्चुगल र क्रोएसियाले प्रतिस्पर्धा गर्दै छन् । यो खेल नेपाली समयानुसार राति १२ः३० बजेदेखि पोर्चुगलको राजधानी लिस्बनस्थित स्टेडियो डी बेन्फिकामा हुने छ ।
आज एक-अर्काविरुद्ध जित निकाल्दै पोर्चुगल र क्रोएसिया सुखद सुरुआत गर्न चाहन्छन् । पोर्चुगलको टोलीमा मुख्य प्रशिक्षक रोबर्टो मार्टिनेजले ३९ वर्षीय क्रिस्टियानो रोनाल्डोलाई पनि समावेश गरेका छन् । कप्तान रोनाल्डो गत महिना सम्पन्न युरो कपमा गोलविहीन बनेका थिए ।पोर्चुगलका कप्तानसमेत रहेका रोनाल्डो पुरुष फुटबलको इतिहासमा सर्वाधिक धेरै अन्तर्राष्ट्रिय गोलकर्ता पनि हुन् । उनले हालसम्म राष्ट्रका लागि दुई सय १२ खेल खेलेर १३० गोल गरेका छन् । तर, रोनाल्डोको युरो कप २०२४ भने निराशाजनक रह्यो । सन् २०१६ को युरोकप जितेका रोनाल्डो गत संस्करणको प्रतियोगितामा भने पाँच खेल खेल्दा गोल गर्न सकेनन् । पोर्चुगल पनि क्वार्टरफाइनल खेलमा फ्रान्ससँग पेनाल्टी सुटआउटमा पराजित हुँदै बाहिरियो ।
अब, यसपालि भने रोनाल्डो र उनी सम्मेलित पोर्चुगलको टिम युइएफए नेसन्स लिगको उपाधि जित्ने योजनामा रहने छ । मार्टिनेजको टोलीमा रोनाल्डोबाहेक जाओ फेलिक्स, डिएगो जोटा, ब्रुनो फर्नान्डेज, बर्नान्डो सिल्भालगायत पनि समावेश छन् ।
यता, क्रोएसियाका प्रशिक्षक ज्लाट्को डेलिकले स्टार मिडफिल्डर लुका मोड्रिकलाई समावेश गरेर नेसन्स लिगका लागि टोलीको घोषणा गरेका छन् । स्पेनिस क्लब रियल मड्रिडबाट व्यवसायिक फुटबल खेल्ने ३८ वर्षीय मोड्रिकका साथै टोलीमा माटेओ कोभासिच, इभान पेरिसिचलगायत खेलाडी पनि समावेश छन् ।
सन् २०१८–१९ मा पोर्चुगलमा आयोजित पहिलो संस्करणको नेसन्स लिगको उपाधि घरेलु टोली पोर्चुगलले नेदरल्यान्ड्सलाई हराउँदै जितेको थियो । सन् २०२०–२१ को युइएफए नेसन्स लिगको विजेता फ्रान्स हो । इटालीमा आयोजित उक्त संस्करणमा उसले त्यसबेला स्पेनलाई हराउँदै उपाधि उचालेको थियो ।
नेदरल्यान्ड्समा भएको अघिल्लो संस्करणमा क्रोएसियामाथि पेनाल्टीमा जित निकाल्दै स्पेन नेसन्स लिगको उपाधि जितेको थियो ।
आज कुन-कुन खेल हुँदै छन् ?
१. अजरबैजान भर्सेस स्विडेन- राति ९ः४५ बजे
२. बेलारुस भर्सेस बुल्गेरिया- राति १२ः३० बजे
३. सान मारियो भर्सेस लेइस्टरचेन- राति १२ः३० बजे
४. उत्तरी आयरल्यान्ड भर्सेस लक्जम्बर्ग- राति १२ः३० बजे
५. स्टोनिया भर्सेस स्लोभाकिया- राति १२ः३० बजे
६. सर्बिया भर्सेस स्पेन- राति १२ः३० बजे
७. स्कटल्यान्ड भर्सेस पोल्यान्ड- राति १२ः३० बजे
८. डेनमार्क भर्सेस स्विट्जरल्यान्ड- राति १२ः३० बजे
९. पोर्चुगल भर्सेस क्रोएसिया- राति १२ः३० बजे
