२० भदौ, विराटनगर ।
चौथौ संस्करणको युरोपियन नेसन्स लिगअन्तर्गत डिफेन्डिङ च्याम्पियन स्पेनले आज सर्बियासँग खेल्दै उपाधि रक्षा यात्रा थाल्दै छ । समूह चरणको पहिलो खेलअन्तर्गत स्पेनले सर्बियाको बेलग्रेडस्थित रेड स्टार स्टेडियममा खेल्दै छ ।
नेदरल्यान्ड्समा भएको अघिल्लो संस्करणमा क्रोएसियामाथि पेनाल्टीमा जित निकाल्दै स्पेन नेसन्स लिगको उपाधि जितेको थियो । यसपालि सोही उपाधि जोगाउन कम्मर कसेको छ, स्पेन ।
स्पेनका प्रशिक्षक लुइस डी ला फुयन्टेले युवा खेलाडीलाई समेटेर नेसन्स लिगका दुई खेल खेल्ने टोली बनाएका छन् । सर्बिया र डेनमार्कसँग खेल्ने टोलीमा बार्सिलोनाका लामिन यमल, फेरान टोरेस, पेड्री, डानी ओल्मो, रोड्रिगो र रियल मड्रिडका डेनियल कार्भजल, पिएसजीका फाबियन रुइज, बिल्बाओका निको विलियम्सलगायत समावेश छन् ।
टोलीमा अल्भारो मोरटा र युनाई सिमोनले चोटका कारण स्थान बनाउन सकेका छैनन् भने नाचो फर्नान्डेज र मिकेल मेरिनोलाई टिमबाट बाहिर राखिएको छ ।यस खेलमा युवा स्टार लामिने यमलले पनि नखेल्नेजस्तो बुझिएको छ । गत सातायता असहज महसुस गरेका यमल टोलीमा नहुने सम्भावना रहेको स्पेनिस मिडिया ‘डाइयरो एएस’ले लेखेको छ ।
मार्टिन जुबिमेन्डीले घाइते रोड्रीको स्थान लिने छन् भने डेनी ओल्मले यमलको स्थान लिने सम्भावना छ । मिकेल ओयार्जबलले भने कप्तान मोरटाको ठाउँ लिने छन् ।
