२१ भदौ, विराटनगर ।
साविक विजेतासमेत रहेको अर्जेन्टिनाले आगामी दुई वर्षपछि हुने फिफा विश्वकपको दक्षिण अमेरिकी छनोटको खेलमा सहज जित आत्मसात् गरेको छ ।
दक्षिण अमेरिकी च्याम्पियन अर्जेन्टिनाले आफ्नो ऐतिहासिक प्रतिद्वन्द्वी चिलीलाई घरेलु मैदान स्टेडियो मास मोनुमेन्टलमा ३-० गोलले हराएको हो ।
शुक्रबार बिहान भएको खेलमा अर्जेन्टिनाको जितमा एलेक्सिस म्याक एलिस्टर, जुलियन अल्भारेज र पाउलो डेबालाले एक-एक गोल गरे ।
पहिलो हाफ गोलरहित बराबरीमा सकिएको खेलको दोस्रो हाफमा अर्जेन्टिनाले तीन गोल थपेको थियो ।दोस्रो हाफ सुरु भएको तेस्रो मिनेटमै अल्भारेजको पासमा एलिस्टरले गोल गर्दै अर्जेन्टिनालाई सुरुआती अग्रता दिलाए ।
निर्धारित खेल सकिन ६ मिनेट बाँकी रहँदा अल्भारेजले नै अग्रता दोब्बर बनाए । इन्जुरी समयको पहिलो मिनेटमा अलेजान्ड्रो गार्नाचोले मिलाइदिएको बललाई डिबालाले गोलमा परिणत गर्दै अर्जेन्टिनालाई सहज जित दिलाए ।
चिलीसँगको खेलमा कप्तान तथा अनुभवी स्ट्राइकर लियोनल मेस्सीले भने खलेनन् । चोटका कारण उनी गत महिनायता मैदान प्रवेश गर्न पाएका छैनन् ।
जितसँगै छनोट चरणको अंक तालिकामा शीर्षता कायमै राखेको छ । जम्मा सात खेल खेलेको अर्जेन्टिनाले १८ अंक जोडेको छ ।
चिली भने पाँच अंकका साथ नवौं स्थानमा छ ।
