२१ भदौ , काठमाण्डौ ।
समकालीन फुटबलका महान् हस्तीहरू भन्नेबित्तिकै हामी अर्जेन्टिनाका लियोनल मेसी अनि पोर्चुगलका क्रिस्टियानो रोनाल्डोलाई मात्रै सम्झन्छौं । सर्वाधिक प्रतिष्ठित अवार्डका विषयमा होस् वा विभिन्न कीर्तिमानमा होस्, ३७ वर्षीय मेसी अनि ३९ वर्षका रोनाल्डोले नै एकछत्र राज गरेका छन् । यसैले पनि उनीहरूलाई दिग्गज खेलाडीका रूपमा सम्झनु स्वभाविक हो ।
तर, एक समय उनीहरूझैं उत्कृष्ट प्रदर्शन गर्ने ब्राजिलका नेयमारलाई भने खेल सर्मथकहरुले करिब–करिब बिर्सिइसकेको अवस्था छ । किनकि, ३२ वर्षीय नेयमारको अधिकांश समय मैदानमा भन्दा बढी ’रिकभरी’ मै बित्ने गरेको छ । एकताका स्पेनिस महारथी बार्सिलोनाबाट मेसी र लुइस स्वारेजसँग एकसाथ मैदान उत्रिन्थे, नेयमार ।
पछिल्लो समय मेसीसहित किलियन एमबाप्पेसँग पिएसजीमा देखिएका नेयमारले पिएसजी छाडेपछि पनिबढी समय मैदान बाहिरै बिताउनु परेको छ । मैदानमा उनको प्रदर्शन र कौशलताले लठ्ठ पर्ने फुटबलप्रेमीहरूले नेयमारलाई बिर्सिनै लागे भन्दा फरक नपर्ला ! बार्सिलोनाबाट सर्वाधिक धेरै सरुवा रकममा फ्रान्सेली क्लब पेरिस सेन्ट जर्मेन (पिएसजी) पुगेका नेयमार हाल साउदी अरेबियन हल हिलालसँग छन् ।
तर, अल हिलालका पछिल्ला ४५ खेलमा भने उनले खेल्न पाएका छैनन् । त्यसअघि पिएसजीमा हुँदा पनि उनले धेरै खेल चोटकै कारण गुमाउनुप¥यो । बार्सिलोनाका लागि पनि उनले अपेक्षानुरूप खेलहरू खेल्न पाएनन् । अहिले ब्राजिलले सन् २०२६ को विश्वकपमा छनोट हुनका लागि गरिरहेको संघर्षमा साथ दिन पनि पाएका छैनन्, नेयमारले ।
चोटका कारण मैदानबाहिर रहेका नेयमारले आगामी कति खेल गुमाउने हुन्, त्यसको अनुमान पनि छैन । किनकि, झन्डै एक वर्षयता उनले खेल्न त के प्रशिक्षणसमेत गर्न सकेका छैनन् । आफ्नो करिअरको अधिकांश समय चोटबाट उन्मुक्त हुन नै बिताउनुपर्ने बाध्यताका कारण पनि उनलाई फुटबल समर्थकले बिर्सिने अवस्थामा पुगेका हुन् ।
तर, नेयमारलाई सम्झिने केही आधारहरू पनि छन् । किनकि, आठ पटकका मेसीलाई सर्वाधिक गोलकर्ता बनाउन पनि नेयमारले अथक भूमिका निभाएका थिए, ’असिस्ट’ गरेर । गोलमा पास मिलाउन सिपालु नेयमार आफ्ना देशका लागि सर्वाधिक धेरै असिस्ट गर्ने खेलाडी पनि हुन् । त्यसबाहेक नेयमार २१औं शताब्दीमा राष्ट्रिय टोलीहरूमा सबैभन्दा धेरै असिस्ट गर्ने खेलाडी पनि हुन् ।
यो मामलामा नेयमारले पूर्वसहकर्मी मेसी अनि रोनाल्डोलाई पनि उछिनेका छन् । नेयमारले हालसम्म राष्ट्रका लागि एक सय २८ खेल खेल्दा ५९ गोलमा पास मिलाएका छन् । जबकि, विश्वकप विजेता मेसीले एक सय ८७ खेल खेल्दा ५८ असिस्ट गरेका छन् । अन्तर्राष्ट्रिय खेलमा सर्वाधिक असिस्ट गर्ने खेलाडीको सूचिको तेस्रो स्थानमा छन्, बेल्जियमका केभिन डी ब्रुयन ।
उनले एक सय पाँच खलमा ४९ असिस्ट गरेका छन् । पोर्चुगलका कप्ता रोनाल्डोले दुई सय १२ खेलमा ४५ असिस्ट गरेका छन् भने इंग्ल्यान्डका डेभिड बेकह्यामले एक सय १५ खेलमा ४२ गोल गरेका छन् । सन् २०१० मा १८ वर्षको उमेरमा ब्राजिलका लागि डेब्यु गरेका नेयमारले ७९ गोलसमेत गरेका छन् । उनी ब्राजिलका सर्वाधिक गोलकर्ता पनि हुन् । ब्राजिलका लागि ७७ गोल गरेका पेलेजस्तो खेलाडीलाई उनले उछिनेका छन् । उनले सन् २०१६ मा भएको रियो ओलम्पिकमा घरेलु राष्ट्र ब्राजिललाई स्वर्ण पदक दिलाएका छन् ।
