२१ भदौ, विराटनगर ।
युरोपियन फुटबल महासंघको आयोजनामा हुने चौथो संस्करणको युरोपियन नेसन्स लिगमा आज आठ खेलहरू हुँदै छन् । युरोपका ५४ सदस्य राष्ट्रहरूले प्रतिस्पर्धा गर्ने नेसन्स लिगको समूह चरणअन्तर्गत आज १६ वटा टोलीले एक-अर्कासँग प्रतिस्पर्धा गर्न आँटेका हुन् ।
आजको आकर्षक खेलका रूपमा सन् २०१८ को विश्वविजेता फ्रान्स र इटालीबीचको ‘म्याच’ रहेको छ । फ्रान्सको राजधानी पेरिस्थित पिएसजीको मैदानमा हुने फ्रान्स र इटालीबीचको खेल नेपाली समयानुसार राति १२ः३० बजे हुने छ ।
यस खेलका लागि अहिलेका स्टार खेलाडी विश्वकप विजेता किलियन एम्बाप्पे पिएसजीको मैदान फर्किँदै छन् । हालैमात्र एम्बाप्पे पिएसजीबाट स्पेनिस क्लब रियल मड्रिड पुगेका थिए ।
फ्रान्सको टिममा एम्बाप्पेसहित र केही नवप्रतिभावान खेलाडी पनि छन् । मुख्य प्रशिक्षक डिडियर डेशच्याम्पको टोलीमा एट्लेटिक मड्रिडका एन्टोइन ग्रिजम्यान, पिएसजीका ओसमान डेम्बेलेलगायत खेलाडी समावेश छन् ।त्यसबाहेक रियल मड्रिडकै फेर्लान मेन्डी, अल इतिहादका एनगोलो काँटे, एसी मिलानका थियो हर्नान्डेज, इन्टर मिलानका मार्कस थोरम, पिएसजीका रान्डल कोलो मौनीलगायत खेलाडी फ्रान्सको टिममा छन् । फ्रान्सले सोमबार बेल्जियमसँग खेल्ने छ ।
यता, इटालीको टोलीमा भने १० महिनाको प्रतिबन्धपछि सान्ड्रो टोनालीले पनि पुनरागमन गरेका छन् । एसी मिलान र ब्रेसियामा सट्टेबाजी गरेको आरोपमा इटालियन फुटबल फेडेरेसनले उनलाई एक वर्षअघि प्रतिबन्ध लगाएको थियो ।
प्रतिबन्धपछि प्रशिक्षक लुसियानो स्पालेट्टीले उनलाई टोलीमा बोलाएका हुन् । त्यसबाहेक इटालीको टोलीमा लेस्टरका डिफेन्डर कालेब ओकोली र एटलान्टाका मिडफिल्डर मार्को ब्रेसियानीलाई पनि पहिलोपटक समावेश गरिएको छ ।
टोलीमा पिएसजीका गोलरक्षक जियानलुइगी डोनारुम्मा, इन्टर मिलानका फेडेरिको डिमार्को, युभेन्टसका फेडेरिको गाट्टी, रोमा लोरेन्जो पेलेग्रिनी, फियोरेन्टिनाका मोइस केन, र लाजियोका माटिया जाकाग्नी छन् । इटालीले सोमबार नै बुडापेस्टमा इजरायलको सामना गर्नेछ ।
अरू कुन-कुन खेल हुँदै छन् त?
१. काजखस्तान भर्सेस नर्वे- साँझ ७:४५ बजे
२. लिथुनियाँ भर्सेस साइप्रस- बेलुकी ९:४५ बजे
३. बेल्जियम भर्सेस इजराइल- राति १२:३० बजे
४. वेल्स भर्सेस टकी- राति १२:३० बजे
५. आइसल्यान्ड भर्सेस मोन्टेनेग्रो- राति १२:३० बजे
६. स्लोभेनिया भर्सेस अस्ट्रिया- राति १२:३० बजे
७. कोसोभो भर्सेस रोमनियाँ- राति १२:३० बजे
८. फ्रान्स भर्सेस इटाली- राति १२:३० बजे
