२१ भदौ, विराटनगर ।
काठमाडौं महानगरका मेयर बालेन्द्र साह (बालेन) ले लेखेको फेसबुक पोस्ट ‘रिकभरी’ भएको छ । एमाले लुम्बिनी प्रदेश सांसद रेखाकुमारी शर्मालाई लक्षित गर्दै बालेनले गरेको पोस्ट फेसबुकले नै हटाएको थियो ।
घरेलु बालश्रमसम्बन्धी स्टाटसलाई फेसबुकले कम्युनिटी गाइडलाइन उल्लंघन भएकाले तीन दिनअघि हटाएको थियो । तथापि, यसबारे फेसबुकले आधिकारिक रूपमा केही उल्लेख भने गरेको थिएन ।
बालेनले उक्त पोस्टमा बालबालिकासम्बन्धी कसूर गरेको आरोप लागेकी एमालेकी प्रदेश सांसद रेखाकुमारी शर्मालाई पक्राउ गर्न प्रधानमन्त्री ओलीलाई फेसबुकमार्फत दबाब दिएका थिए ।
तर, बालेनको पोस्ट उडेपछि उनका समर्थकहरूले प्रधानमन्त्री केपी शर्मा ओलीलाई फेसबुक ‘अनफलो’ अभियान चलाएका थिए । मंगलबार नेकपा एमालेका कार्यकर्ताहरूले फेसबुक पोस्टमा ‘रिपोर्ट’ गरेर आफ्नो स्टाटस नै हटेको संकेत गरेपछि बालेन समर्थकहरूले ‘फलो-अनफलो’ अभियान चलाएका थिए ।जसका कारण ओलीले फेसबुकका ७७ हजार फलोअर्स गुमानु परेको थियो । ओलीसहित शीर्ष नेताहरूलाई सामाजिक सञ्जाल फेसबुकमा अनफलो गर्ने अभियान चल्दा धेरै नेताको फलोअर्स घटेको थियो ।
सांसद शर्मामाथि एक नाबालिकालाई विगत आठ वर्षदेखि बाल श्रमिक बनाएर राखेको आरोप लागेको छ । शर्मा लुम्बिनी प्रदेश सांसद हुन् । उनको काठमाडौँस्थित घरमा १४ वर्षीया बालिकालाई ८ वर्षदेखि बाल श्रमिकका रुपमा राखेको पाइएपछि महानगरपालिकाले उद्धार गरेको थियो ।
