२३ भदौ, विराटनगर ।
चौथौ संस्करणको युरोपियन नेसन्स लिगअन्तर्गत नेदरल्यान्ड्सले सानदार सुरुआत गरेको छ । शनिबार राति भएको समूह चरणको खेलमा नेदरल्यान्ड्सले बोस्निया एन्ड हर्जगोभिनालाई ५–२ गोलान्तरले हराएको हो ।
घरेलु मैदानमा भएको खेलमा नेदरल्यान्ड्सलाई जिताउन जोसुआ जिर्क्जी, टिजनी रेइन्डर्स, कोडी गाप्को, वाउट वेइगहोर्स्ट र जाभी सिमोन्सले एक-एक गोल गरे । बोस्नियाका लागि इमर्डिन डेमिरोभिक र इडिन जेकोले एक-एक गोल गरे ।
पहिलो हाफ २-१ गोलको अग्रता बनाएको नेदरल्यान्ड्सले दोस्रो हाफमा तीन गोल थपेको थियो । बोस्नियाले भने दोस्रो हाफमा एक गोलमात्र गर्यो ।
जितसँगै समूह ‘सी’ को नेदरल्यान्ड्सले तीन अंक जोड्यो । अब, नेदरल्यान्ड्सले जर्मनीसँग मंगलबार राति घरेलु मैदानमा खेल्ने छ ।
