२३ भदौ, विराटनगर ।
चौथौ संस्करणको युरोपियन नेसन्स लिगअन्तर्गत आजबाट दोस्रो चरणका खेलहरू हुँदै छन् । शनिबार रातिबाट पहिलो चरणका खेलहरू सकिएसँगै आज दोस्रो चरणका नौ खेलहरू हुन आँटेका हुन् ।
पहिलो संस्करणको विजेता पोर्चुगलका साथै साविक विजेता स्पेन, क्रोएसियालगायत १८ वटा राष्ट्रहरू प्रतिस्पर्धामा छन् ।
आज सन् २०१८-१९ को विजेता पोर्चुगलले स्कटल्यान्डसँग घरेलु मैदानमा खेल्ने छ । पोर्चुगलले आफ्नो पहिलो खेलमा लुका मोड्रिच नेतृत्वको क्रोएसियालाई हराउँदै सुखद सुरुआत गरेको थियो । समूह ‘ए’ को पोर्चुगल अब दोस्रो जितको खोजीमा छ ।
यस्तै, आजको अर्को खेलमा डिफेन्डिङ च्याम्पियन स्पेनले स्विट्जरल्यान्डसँग उसैको मैदानमा खेल्ने छ । पहिलो खेलमा सर्बियासँग बराबरी खेलेको स्पेन स्विट्जरल्यान्डलाई हराउने दाउमा छ । डेनमार्कसँग स्तब्ध बनेको स्विट्जरल्यान्ड पनि आज पहिलो जितकै खोजीमा छ ।
यता, क्रोएसियाले पोल्यान्डलाई घरेलु मैदानमा आतिथ्यता प्रदान गर्दै छ । यस खेलमा पोल्यान्ड दोस्रो जितको खोजीमा हुँदा क्रोएसिया पहिलो जित निकाल्ने योजनामा हुने छ । पोल्यान्डले पहिलो खेलमा स्कटल्यान्डलाई उसैको मैदानमा हराउँदा क्रोएसिया पोर्चुगलसँग हारेको थियो ।
सन् २०१८–१९ मा पोर्चुगलमा आयोजित पहिलो संस्करणको नेसन्स लिगको उपाधि घरेलु टोली पोर्चुगलले नेदरल्यान्ड्सलाई हराउँदै जितेको थियो । सन् २०२०–२१ को युइएफए नेसन्स लिगको विजेता फ्रान्स हो । इटालीमा आयोजित उक्त संस्करणमा उसले त्यसबेला स्पेनलाई हराउँदै उपाधि उचालेको थियो ।
नेदरल्यान्ड्समा भएको अघिल्लो संस्करणमा क्रोएसियामाथि पेनाल्टीमा जित निकाल्दै स्पेन नेसन्स लिगको उपाधि जितेको थियो ।
आज हुँदै छन्, यी खेलहरू:
१. लक्जम्बर्ग भर्सेस बेलारुस- साँझ ६:४५ बजे
२. बुल्गेरिया भर्सेस उत्तरी आयरल्यान्ड- बेलुका ९:४५ बजे
३. डेनमार्क भर्सेस सर्विया- बेलुका ९ः४५ बजे
४. स्लोभाकिया भर्सेस अजरबैजा- बेलुका ९ः४५ बजे
५. गिब्रलटार भर्सेस लेइचटेन- बेलुका ९ः४५ बजे
६. पोर्चुगल भर्सेस स्कटल्यान्ड- राति १२ः३० बजे
७. स्विट्जरल्यान्ड भर्सेस स्पेन- राति १२ः३० बजे
८. स्विडेन भर्सेस स्टोनिया- राति १२ः३० बजे
९. क्रोएसिया भर्सेस पोल्यान्ड- राति १२ः३० बजे
