२४ भदौ, काठमाडौं ।
सत्तारूढ दल नेपाली कांग्रेसभित्रमा प्रधानमन्त्री पद शेरबहादुर देउवाले सम्हाल्नेजस्तो देखिएपछि सभापतिमा आकंक्षा राख्नेहरू बढ्न थालेका छन् ।
सत्ता समीकरण फेरबदल नभएमा नेकपा एमालेका अध्यक्ष केपी शर्मा ओलीको पालो सकिएपछि गठबन्धनबीचको सहमतिअनुसार देउवाले मुलुकको कार्यकारी भूमिका सम्हाल्ने छन् । त्यसपछि भने कांग्रेसले नयाँ सभापति पाउने हो कि भन्ने अनुमान गर्न सकिन्छ ।
यसैबीच, कांग्रेसका प्रभावशाली नेता मानिने डा. शेखर कोइरालाले सभापतिमा इच्छा जताइरहँदा अर्का नेता डा. शशांक कोइरालाले आकंक्षा प्रस्तुत गरेका छन् ।
नवलपरासी पूर्व-१ बाट प्रतिनिधिसभा सदस्यमा निर्वाचित कोइरालाले आगामी महाधिवेशनमा पार्टी सभापतिको उम्मेदवार बन्ने बताएका हुन् ।सोमबार काठमाडौंमा विश्वेश्वरप्रसाद कोइरालाको १११औं जन्मजयन्तीको अवसरमा आयोजित कार्यक्रमलाई सम्बोधन गर्दै उनले यस्तो बताएका हुन् । उनले यसपटक पार्टी सभापतिमा उठ्ने भन्दै भविष्यमा निर्धारण हुने पनि बताए ।
बिपीको छोरो हुनेबित्तिकै आफूलाई हरेक कुरामा सबैभन्दा अगाडि सार्ने काम गरेको पनि बताए । उनले आफूले सहजै निर्वाचन जित्ने गरेको र अहिलेसम्म पाँचपटक जितिसकेको बताए ।
विधानअनुसार २०८२ मंसिरभित्र महाधिवेशन गरिसक्नुपर्ने हुन्छ । जसमा मोरङ क्षेत्र नम्बर ६ बाट संघीय सदनका लागि निर्वाचित बनेका शेखर कोइरालाले पनि इच्छा जताइरहेका छन् ।
