२४ भदौ, विराटनगर ।
आगामी असोज ४ गतेदेखि १४ गते (सेप्टेम्बर २०-३०) सम्म आयोजना हुने साफ यु-१७ च्याम्पियनसिपका लागि नेपालले टोली घोषणा गरेको छ । सोमबार अखिल नेपाल फुटबल संघ (एन्फा)ले भुटानमा आयोजना हुने उक्त प्रतियोगिताका लागि प्रारम्भिक टोलीको घोषणा गरेको हो ।
टोलीको गोलकिपरहरू पेम्बा नुर्बु भोटे, रामबहादुर बोहरा, भक्तबहादुर परियार, डिफेन्डरमा शरण एसके, प्रशान्त मोक्तान, जीवन गुरुङ, सुजलमान घले, निशानराज लावत, भुवन कामी, एकराज विश्वकर्मा रहेका छन् ।
यस्तै, मिडफिल्डरमा कृष्णबहादुर आले, जोन विष्ट, पवन पाख्रिन, सविनय कटुवाल, अनुभव पुरी, लक्ष्मण थामी, विज्ञान खड्का, सुवास बम, अलिक श्रेष्ठ र सविनकुमार लुंगेली रहेका छन् भने फरवार्डमा रोहित श्रेष्ठ, सन्तोष गोङ्वा, सुजन डंगोल रहेका छन् ।
नेपालले पाकिस्तानसँग असोज ५ गते दिउँसो २ बजे खेल्दै यो प्रतियोगिताको थालनी गर्ने छ । उक्त तालिकाअनुसार नेपाल समूह ‘बी’ मा छ । यस समूहमा नेपाल र पाकिस्तानसँगै आयोजक भुटान र श्रीलंका छन् । यता, समूह ‘ए’ मा भने साविक विजेता भारतसँगै माल्दिभ्स र बंगलादेश छन् ।नेपालले समूह चरणको पहिलो खेलमा पाकिस्तानसँग खेल्दो दोस्रो खेलमा ७ गते श्रीलंकासँग खेल्ने छ भने ९ गते भुटानसँग खेल्ने छ ।प्रतियोगितामा दक्षिण एसियाका सातवटै राष्ट्र सहभागी छन् । सात टोलीलाई दुई समूहमा विभाजन गरिएको छ ।
दुवै समूहको शीर्ष दुई स्थानमा रहने टोली सेमिफाइनल प्रवेश गर्नेछन् । फाइनल खेल सेप्टेम्बर ३० मा हुने छ । गत वर्ष भुटानमै भएको साफ यू-१७ च्याम्पियनसिपमा नेपाल समूह चरणबाटै बाहिरिएको थियो ।
