२५ भदौ, विराटनगर ।
चौथौ संस्करणको युरोपियन नेसन्स लिगमा फ्रान्सले पहिलो जित आत्मसात् गरेको छ । सोमबार राति भएको दोस्रो चरणको खेलमा फ्रान्सले बेल्जियमलाई २-० गोलले हराएको हो ।
सन् २०१८ को विश्वविजेता फ्रान्स र फिफा वरीयताको छैटौं टोली बेल्जियम फ्रान्सको लियोनस्थित ग्रुपमा स्टेडियममा खेलेका थिए, जसमा घरेलु टिमलाई जिताउन रान्डल कोलो मुआनी र ओस्मान डेम्बेलेले एक-एक गोल गरे ।
स्टार फरवार्ड तथा कप्तान किलियन एमबाप्पे भने बेन्चबाट मैदान प्रवेश गरेका थिए । तर, उनी मैदान छिर्नुअगावै पेरिस सेन्ट जर्मेन (पिएसजी) मा एमबाप्पेका दुई पूर्वसहकर्मी मुआनी र डेम्बेलेले गोल गरिसकेका थिए ।
खेलको ३०औं मिनेटमा कोलो मुआनीले गोल गर्दै फ्रान्सलाई अग्रता दिलाएका थिए । ५७औं मिनेटमा डेम्बेलेले अर्को गोल थप्दै फ्रान्सलाई तीन अंक दिलाए ।
जितसँगै फ्रान्स अंक तालिकाको दोस्रो स्थानमा उक्लिएको छ । फ्रान्सको शीर्ष स्थानमा रहेको इटालीको भन्दा तीन अंक कम छ ।यसअघि फ्रान्स यही मैदानमा शुक्रबार राति भएको खेलमा इटालीसँग ३–१ ले पराजित भएको थियो ।
