२५ भदौ, ओखलढुंगा ।
ओखलढुंगाको सुनकोशी गाउँपालिका-५ मूलखर्कस्थित चौतारा माध्यमिक विद्यालयका तीनवटा कक्षा बन्द गरिएको छ । अचानक विद्यार्थी बेहोस हुन थालेपछि कक्षा ८, ९ र १० को कक्षा बन्द भएको प्रधानाध्यापक कमलबहादुर कटवालले जानकारी दिए ।
उनका अनुसार विद्यार्थीमा रुने, चिच्चाउने, कराउने, हाँस्ने, काम्ने जस्ता लक्षण देखिने र बेहोस हुन थालेको थियो । सुरुमा एक–दुई जना विद्यार्थीमा मात्रै यस्तो समस्या देखिए पनि तीन दिन अघिदेखि भने २५ भन्दा बढी विद्यार्थीमा समस्या देखिएको हो ।
जसपछि कक्षाको पठनपाठन नै बन्द गर्नुपरेको प्रअ कटवालको भनाइ छ । उनले भने, ‘अचानक विद्यार्थी रुने, कराउने, चिच्याउने, लड्ने, बेहोस हुने जस्ता समस्या देखापरे । बिरामी भएका विद्यार्थीबाट अरुमा पनि सर्ने क्रम बढेपछि हामीले समाधानको उपाय खोज्न दुई दिनका लागि कक्षा ८, ९ र १० को पठनपाठन बन्द गरेका हौं ।’
अभिभावकबाट धार्मिक पूजापाठसहित लामा पढाउनुपर्ने सुझाव आए पनि आफूहरुले गाउँपालिकालाई मनोपरामर्शका लागि पहल गरिदिन भनेको प्रधानाध्यापक कटवालको भनाइ छ ।
कक्षा ८, ९ र १० बाहेक अन्य नर्सरीदेखि कक्षा ७ साथै कक्षा ११ र १२ तथा प्राविधिक धारतर्फका विद्यार्थीमा यस्तो समस्या नदेखिएको विद्यालयले जनाएको छ।
