२५ भदौ, एजेन्सी ।
चौथौ संस्करणको युरोपियन नेसन्स लिगअन्तर्गत फ्रान्ससँग हारेपछि बेल्जियमको टोलीभित्र आन्तरिक किचलो उत्पन्न भएको छ । सोमबार राति भएको दोस्रो चरणको खेलमा बेल्जियम फ्रान्ससँग २–० गोलले पराजित भएको थियो ।
सन् २०१८ को विश्वविजेता फ्रान्स र फिफा वरीयताको छैटौं टोली बेल्जियम फ्रान्सको लियोनस्थित ग्रुपमा स्टेडियममा खेलेका थिए । जसमा रान्डल कोलो मुआनी र ओस्मान डेम्बेलेले एक–एक गोल गरेपछि घरेलु टोली विजयी हुँदा पाहुना टोली स्तब्ध बनेको थियो ।
त्यसअघि हंगेरीमा भएको आफ्नो पहिलो खेलमा इजराइललाई २–१ गोलले हराएको थियो, बेल्जियमले । पहिलो खेलमा केभिन डी ब्रुयनले दुई तथा युरी टाइलेमान्सले एक गोल गरेका थिए । तर, दोस्रो खेलमा भने बेल्जियमको प्रदर्शन अपेक्षाकृत रहेन । खेलको ६७औं मिनेटसम्म फ्रान्स किलियन एम्बाप्पेबिहिन थियो ।
त्यसको फाइदा उठाएर गोल गर्न असफल बन्यो, बेल्नियम । एम्बाप्पले खेलको ६७औं मिनेटमा मैदान प्रवेश गरेर फ्रान्सेली टोलीको आत्मविश्वास बढाएका थिए । तर, उनी प्रवेश गर्नुअगावै मुआनी र डेम्बेलेको गरेको गोल नै फ्रान्सको जितमा पर्याप्त बन्यो ।फ्रान्ससँग पराजय खेपेपछि बेल्जियमको टोलीमा खैलाबैला भयो । टिमभित्र नयाँ युद्ध सुरु भएपछि स्टार मिडफिल्डर केभिन डी ब्रुयन अन्तर्राष्ट्रिय फुटबलबाट सन्न्यास लिने संकेतसम्म गरेका छन् । म्यानचेस्टर सिटीबाट व्यवसायिक फुटबल खेल्दै आएका ब्रुयनले खेलपछि बेल्जियन टिमका टेक्निकल डाइरेक्टर फ्रान्क भेर्कुटेरेनलाई ‘मैले छोडेँ’ भनेका हुन् ।
१४ वर्षअघि बेल्जियमका लागि डेब्यु गरेर एक सय सात खेल खेल्दै ३० गोल गरेका ब्रुयनले भनाभनपछि निराशा प्रकट गरेका हुन् । बेल्जिमयका कप्तानसमेत रहेका उनले खेलपछि पत्रकार सम्मेलनमा बोल्दै डोमेनिको टेडेन्स्को नेतृत्त्वको टोलीका सहकर्मीहरूविरुद्ध पनि ‘फायर’ खोलेका थिए ।
विपक्षी टोली फ्रान्स तुलनात्मक रूपमा बलियो हो कि! भन्ने पत्रकारको प्रश्नमा उनले भनेका छन्, ‘हो, पक्कै पनि । फ्रान्सका बारेमा भन्नैपर्दैन । प्रतियोगिता प्रतिस्पर्धात्मक हुन्छ नै, यसमा उत्कृष्ट खेल्न सकिएन भने नजिता राम्रो आत्मसात् गर्न सकिँदैन पनि ।’
करिब डेढ दशकयता राष्ट्रका लागि खेल्दै आएका उनले अब राष्ट्रिय टोलीबाट नखेल्नेजस्तो संकेत गरे । ‘हामीले मैदानमा सबैथोक खर्चिनुपर्ने थियो, तर कसैको पनि मिहिनेत देखिएन,’ उनले भने, ‘मैले स्वीकार गर्नैपर्छ किन हामीले राम्ररी खेल्न सकेनौं । म अहिले ३३ वर्ष भएँ । म अब गर्न कुनै हालतमा गर्न सक्दिनँ पनि ।’
ब्रुयनको संकेतलाई लिएर पत्रकारहरूले प्रशिक्षक टेडेस्कोलाई प्रश्न तेर्स्याएका थिए, जसमा बोल्दै उनले भने, ‘उनको निराशा स्वभाविक हो । केभिन विजेता हुन्, उनी भावुक छन् । मलाई पनि उनले अन्तर्राष्ट्रिय खेल खेल्न छोड्छन् कि भन्ने छ । तर, शान्त बसौं, उनले त्यस्तो निर्णय लिँदैनन् ।’
नेसन्स लिगमा दुई खेल खेलेको बेल्जियम लिग ‘ए’ अन्तर्गत समूह २ को दोस्रो स्थानमा छ । तेस्रो स्थानमा छ । अब, उसले अक्टोबरमा इटाली र फ्रान्ससँग अनि नोभेम्बरमा इटाली र इजराइलसँग खेल्ने छ ।
