२६ भदौ, एजेन्सी ।
भारतको मध्य प्रदेशको राजगढ जिल्लामा प्रहरीबीचको त्रिकोणात्मक प्रेमका कारण वरिष्ठ निरीक्षकको हत्या भएको खुलेको छ । भारतीय मिडिया आजतकका अनुसार उनको हत्यामा महिला हवल्दारको संलग्नता रहेको आशंका पुष्टि भएको छ ।
प्रहरी इन्स्पेक्टर दीपांकर गौतमलाई कारले ठक्कर दिएर ज्यान लिएको आरोपमा महिला हवल्दार पल्लवी सोलंकी पक्राउ परेकी छन् । मध्यप्रदेशको पचोर प्रहरी स्टेसनमा कार्यरत पल्लबीका साथी करण ठाकुरलाई पनि प्रहरीले नियन्त्रणमा लिएर अनुसन्धान गरिरहेको छ ।
मंगलबार ब्यावरा सहरको आगरा-मुम्बई राजमार्गमा करणले चलाउँदै गरेको पल्लबीको कारले ठक्कर दिँदा मोटरसाइकलमा सवार दीपांकर गम्भीर घाइते भएका थिए । घाइते उनको ब्यावरस्थित सिविल अस्पतालमा प्राथमिक उपचारपछि एउटा कारमा राखेर भोपाल रेफर गरिएको थियो । तर, कुरावर र श्यामपुरको बीच पुग्दा नपुग्दै बाटोमै उनको मृत्यु भएको हो ।
पल्लबी र करण मध्यप्रदेशबाट दीपांकरको हत्या गर्ने योजनाका साथ उत्तरप्रदेशस्थित देहात प्रहरी स्टेसन पुगेका थिए । प्रहरी स्टेसनबाट निस्किएका दीपांकरलाई गाडीले ठक्कर दिएपछि उनीहरू आफैं प्रहरी चौकी पुगेका थिए ।
राति अबेरसम्म प्रहरी उपरीक्षक आदित्य मिश्राले सोधपुछ गर्ने क्रममा दुवैले हत्या स्वीकार्दै त्रिकोणाात्मक प्रेम प्रसंग बाहिर निकालेका थिए । प्रहरीले करण र पल्लबी प्रेमी-प्रेमिका भएको र वरिष्ठ इन्स्पेक्टरसँग पनि कुनै न कुनै साइनो भएको आशंका गरेको छ । तथापि, यस विषयमा अनुसन्धान भइरहेको प्रहरीले जनाएको छ ।
