२६ भदौ, एजेन्सी ।
फिफा विश्वकप फुटबलको छनोट खेलअन्तर्गत पाँच पटकको विश्वविजेता ब्राजिल पाराग्वेसँग हारेपछि ब्राजिलियन टोलीमा नेयमारको अभाव खड्किएको हो किन भन्ने अनुमान लगाउन थालिएको छ ।
आगामी दुई वर्षपछि क्यानडा, मेक्सिको र अमेरिकामा संयुक्त रूपमा आयोजना हुने विश्वकपको दक्षिण अमेरिकी छनोटमा ब्राजिल पाराग्वेसँग १-० गोलले हारेको हो । पछिल्ला चार खेलमध्ये ब्राजिलले एक जित मात्रै हासिल गर्न सफल भएको छ । छनोटको अंक तालिकामा आठ खेलबाट १० अंक जोडेको ब्राजिल पाँचौं स्थानमा छ ।
यसरी ब्राजिलले जितका लागि संघर्ष गरिरहँदा स्टार खेलाडी नेयमारको चरम अभाव खड्किएको ब्राजिलका समर्थकहरूको आँकलन छ । सन् २०१० मा नेयमारले डेब्यु गरेयता उनी हुँदा र नहुँदा कति फरक पर्छ ? तथ्यांकका अनुसार नेयमार टोलीमा रहँदा ब्राजिलको जित धेरै रहेको छ ।
नेयमारले हालसम्म ब्राजिलबाट एक सय २८ खेल खेलेका छन्, जसमध्ये ९२ खेलमा ब्राजिलले जित दर्ता गरेको छ । नेयमार हुँदा २४ खेलमा बराबरी खेल्दा १२ खेलमा हार बेहोरेको छ । टोलीमा नेयमार उपलब्ध हुँदा ब्राजिलको जित प्रतिशत ७२ प्रतिशत रहेको छ भने हारतर्फ नौ प्रतिशत मात्र छ ।
तर, नेयमारलाई टोलीमा नराखेर ब्राजिलले ६० खेल खेलेको छ, जसमध्ये ३३ खेलमा जित निकालेको छ । १४ खेलमा बराबरी खेल्दा १३ खेलमा हार खेपेको छ । नेयमार हुँदा ब्राजिलको जित प्रतिशत ५५ हुँदा २१ प्रतिशतमा हार रहेको छ । यसरी हेर्दा नेयमार हुँदा ब्राजिलियन टोली बलियो रहेको देखिन्छ ।
ब्राजिलले सन् २०२६ को विश्वकपमा छनोट हुनका लागि गरिरहेको संघर्षमा साथ दिन पनि पाएका छैनन्, नेयमारले । चोटका कारण मैदानबाहिर रहेका नेयमारले आगामी कति खेल गुमाउने हुन्, त्यसको अनुमान पनि छैन । किनकि, झन्डै एक वर्षयता उनले खेल्न त के प्रशिक्षणसमेत गर्न सकेका छैनन् ।
गोलमा पास मिलाउन सिपालु नेयमार आफ्ना देशका लागि सर्वाधिक धेरै असिस्ट गर्ने खेलाडी पनि हुन् । त्यसबाहेक नेयमार २१औं शताब्दीमा राष्ट्रिय टोलीहरूमा सबैभन्दा धेरै असिस्ट गर्ने खेलाडी पनि हुन् । यो मामलामा नेयमारले पूर्वसहकर्मी लियोनल मेसी अनि क्रिस्टियानो रोनाल्डोलाई पनि उछिनेका छन् ।
नेयमारले हालसम्म राष्ट्रका लागि एक सय २८ खेल खेल्दा ५९ गोलमा पास मिलाएका छन् । जबकि, विश्वकप विजेता मेसीले एक सय ८७ खेल खेल्दा ५८ असिस्ट गरेका छन् भने पोर्चुगलका कप्तान रोनाल्डोले दुई सय १२ खेलमा ४५ असिस्ट गरेका छन् ।
सन् २०१० मा १८ वर्षको उमेरमा ब्राजिलका लागि डेब्यु गरेका नेयमारले ७९ गोलसमेत गरेका छन् । उनी ब्राजिलका सर्वाधिक गोलकर्ता पनि हुन् । ब्राजिलका लागि ७७ गोल गरेका पेलेजस्तो खेलाडीलाई उनले उछिनेका छन् । सन् २०१६ मा भएको रियो ओलम्पिकमा घरेलु राष्ट्र ब्राजिललाई स्वर्ण पदक दिलाएका छन्, नेयमारले ।
