२६ भदौ , काठमाण्डौ ।
गएको साउन ३१ गते भक्तपुरको थिमी नगरपालिकाको गठ्ठाघरमा एक ट्रकले स्कुटरलाई ठक्कर दिएर भएको भयानक सडक दुर्घटनामा मुख्य अभियुक्त मानिएका ट्रक चालक कारागार चलान भएका छन् ।
भक्तपुरको मध्यपुर थिमि नगरपालिका–३ गठ्ठाघरमा स्कुटर चालकको ज्यान गएको दुर्घटनामा पक्राउ परेका ट्रक चालक सर्लाहीको मलंगवा नगरपालिका–२ घर भएका मलङ सतेन्द्र श्रेष्ठ कारागार चलान भएका छन् ।
ना६ख २१७३ नम्बरको ट्रकका चालक श्रेष्ठ पुर्पक्षका लागि कारागार चलान भएका हुन् । गएको साउन ३१ गते दिउँसो १ः४० बजे श्रेष्ठले चलाएको ट्रकले ठक्कर दिंदा बा४९प ८९४४ नम्बरको स्कुटरका चालक ओखलढुंगाको चिशंखुगढी गाउँपालिका–४ छहरे घर भई काठमाडौं कपनमा बस्दै आएका ६५ वर्षका उत्तम कोइरालाको घटनास्थमै मृत्यु भएको थियो ।
अदालतको आदेशपछि श्रेष्ठलाई कारागार पठाइएको जिल्ला प्रहरी परिसर भक्तपुरका डीएसपी मोहनमणि अधिकारीले बताएका छन् । २४ भदौमा भक्तपुर जिल्ला अदालतका न्यायाधीश विद्यानाथ भट्टराईको इजलासले श्रेष्ठलाई कारागार चलानको आदेश दिएको थियो ।
श्रेष्ठविरुद्ध यातायात व्यवस्था तथा सवारी ऐन २०४८ को दफा १६१ को उपदफा (२) को कसुरमा मुद्दा दर्ता गरिएको थियो । उपदफा (२)मा ज्यान मार्ने मनसाय तथा उद्देश्य नराखी लापरबाही तरिकाले सवारी चलाएर कसैको मृत्यु भएमा कसुरको मात्रा हेरेर २ वर्षदेखि १० वर्षसम्म कैद हुने व्यवस्था ऐनमा उल्लेख छ ।
स्थानीयले भने उक्त दुर्घटनामा पहिले ट्राफिकले जथाभावी चेकजाँच गर्दा दुर्घटना भएको भन्दै दुर्घटनापछि गठ्ठाघर चोकमा प्रदर्शन भएपछि स्थिति तनावग्रस्त बनेको थियो । प्रदर्शनलाई नियन्त्रणमा लिन ठूलो संख्यामा प्रहरी परिचालन र २२ राउण्ड अश्रु ग्याँससमेत प्रहार गर्नुपरेको थियो ।
प्रदर्शनका क्रममा केही प्रहरी स्थानीय घाइते भएका थिए । घटनाको छानबिन गर्न भक्तपुरका सहायक सीडीओ डोरेन्द्र निरौला र प्रहरीले काठमाडौं उपत्यका प्रहरी कार्यालय रानीपोखरीका एसपी प्रजित केसी नेतृत्वमा छुट्टा–छुट्टै दुई समिति बनेका थिए ।
दुवै समितिले ट्राफिकले दुर्घटनामा परेका सवारी नरोकेको निष्कर्ष निकाल्दै ट्राफिकको गल्ती नरहेको उल्लेख गरी प्रतिवेदन बुझाएको थियो ।
