२७ भदौ , काठमाण्डौ ।
नेपालले क्यानडापछि अमेरिकामा खेल्ने आईसीसी विश्वकप लिग–२ को खेल तालिका सार्वजनिक गरेको छ । नेपाल, अमेरिका र स्कटल्यान्डबीच लिग–२ मा प्रतिस्पर्धा हुनेछ । लिग–२ मा नेपालले खेल्ने सबै खेलहरु प्रेरिरी भ्यू ह्युस्टनमा राति १० ः १५ मा सुरु हुनेछन् ।
नेपालले पहिलो खेल २७ अक्टोबरमा अमेरिकासँग खेल्नेछ । दोस्रो खेल स्कटल्यान्डसँग २९ अक्टोबरमा र तेस्रो खेल २ नोभेम्बरमा अमेरिकासँग खेल्नेछ । त्यस्तै ४ नोभेम्बरमा स्कटल्यान्डसँग खेल्नेछ । त्यसपछि यी तीन टोलीबीच टी–२० सिरिज हुनेछ ।
लिग–२ र त्रिकोणात्मक टी–२० आई सिरिज खेल्न नेपाली टोली मंगलबार राति क्यानडातर्फ गइसकेको छ । नेपालले लिग २ मा क्यानडासँग १६ र २२ सेप्टेम्बरमा खेल्नेछ । त्यस्तै ओमानसँग १८ र २४ सेप्टेम्बरमा लिग–२ मा प्रतिस्पर्धा गर्नेछ ।
त्यसपछि नेपाल, ओमान र क्यानडाबीच त्रिकोणात्मक टी–२० आई सिरिज पनि हुनेछ । नेपालले त्रिकोणात्मक टी–२० आई सिरिजमा २८ सेप्टेम्बरमा क्यानडा, २९ मा ओमान, १ अक्टोबरमा क्यानडा र २ अक्टोबरमा ओमानसँग खेल्नेछ ।
क्यानडामा यी खेल सकिएपछि नेपाली टोली अमेरिका जानेछ । नेपाली टोलीले यी दुई टोलीविरुद्ध हुने चार खेल जितेमा अंक तालिकाको शीर्ष–३ भित्र पुग्ने छ । ४ खेलबाट २ अंक भएको नेपाल तालिकाको सातौँ स्थानमा छ।
ओमान समान खेलपछि ३ अंक जोडेर छैटौँ स्थानमा छ। तेस्रो स्थानमा रहेको क्यानडाको ८ खेलबाट ८ अंक छ। ८ खेलबाट १२ अंक भएको नेदरल्यान्ड्स शीर्षस्थानमा छ। दोस्रो स्थानमा रहेको स्कटल्यान्डको ७ खेलबाट ९ र ८ खेलबाट ८ अंक भएको नामिबिया चौथो स्थानमा छ।
पाचौँ स्थानमा रहेको अमेरिकाको ४ खेलबाट ४ अंक छ। ८ टोली रहेको प्रतियोगितामा यूएईले ३ खेल खेलेपनि अंक जोड्न सकेको छैन। नेपालले जित हात पारेको एक मात्र खेल हाल शीर्षस्थानमा रहेको नेदरल्यान्ड्सविरुद्ध थियो।
यस्तै गत जुलाईमा भएको विश्वकप लिग–२ को आफ्नो पहिलो शृंखलामा ओमानले स्कटल्यान्ड र नामिबियासँग खेलेको थियो । नामिबियासँग एक जित र एक हारको नतिजा निकालेको ओमानले स्कटल्यान्डसँग एक खेल हारेको थियो भने एक खेल रद्ध भएका कारण अंक बाँढ्न पुगेको थियो।
विश्वकप लिग–२ मा नेपालले ९ वटा शृंखलामा कुल ३६ खेल खेल्ने छ। यो शृंखला सन् २०२७ मा दक्षिण अफ्रिकामा हुने एकदिवसीय विश्वकप छनोटको आधार रहेको छ । ओडीआई वरीयतामा नेपालले खेल्ने टिमहरुमा स्कटल्याण्ड निक्कै माथि रहेको छ ।
वरीयतामा स्कटल्याण्ड ११ औं स्थानमा छ । ओमान, अमेरिका र क्यानडा भन्दा भने नेपाल माथि रहेको छ । नेपाल १६ औं स्थानमा रहदा ओमान १७ औं, अमेरिका १८ औं र क्यानडा १९ औं स्थानमा रहेको छ । नेपालले क्यानडा र अमेरिकामा हुने विश्व क्रिकेट लिग २ को दोस्रो चरणका लागि रोहित पौडेलको कप्तानीमा अन्तिम टोली घोषणा गरेको छ ।
गतसोमबार घोषणा गरिएको नेपाली टोलीमा रोहितसंगै आसिफ शेख, अनिल शाह, भीम सार्की, कुशल मल्ल, अर्जुन साउद, सोमपाल कामी, करण केसी, गुलसन झा, रिजन ढकाल, ललितसिंह राजवंशी, कुशल भुर्तेल, दीपेन्द्रसिंह ऐरी र सन्दीप लामिछाने छन् ।
देव खनाल टोलीमा ट्राभलिङ रिजर्भ खेलाडीको रूपमा रहनेछन् । लेग स्पिनर सन्दीप लामिछाने १२ महिना पछि ओडिआई टोलीमा पुनरागमन गरेका हुन् । एक वर्षअघि आयोजित एसिया कप उनले खेलेको अन्तिम एकदिवसीय अन्तर्राष्ट्रिय प्रतियोगिता थियो ।
त्यतिबेला उनले अन्तिम खेल भारतसँग खेलेका थिए । सन्दीप एकदिवसीय अन्तर्राष्ट्रिय क्रिकेटमा सर्वाधिक विकेट लिने नेपाली बलर हुन् । उनले हालसम्म ५१ खेलमा ११२ विकेट लिएका छन् । अन्य कुनै पनि नेपाली बलरले सय विकेट पुरा गर्न सकेका छैनन् ।
टी–२० विश्वकपमा अमेरिकाले भिषा नदिएका कारण उनले त्यहाँ भएका खेलहरुमा सहभागिता जनाउन सकेनन् । तर त्यसपछि वेस्ट इन्डिजमा भएका बाँकी दुई समूह चरणका खेलमा भने उनले शानदार प्रदर्शन गरेका थिए ।
