२९ भदौ, एजेन्सी ।
अर्जेन्टिनी स्ट्राइकर लियोनल मेसी दुई महिनापछि इन्टर मियामीको प्रशिक्षणमा फर्किएका छन् । क्लबले शुक्रबारबाट ३७ वर्षीय मेस्सीले क्लबको प्रशिक्षणमा पुनरागमन गरेको जानकारी दिएको छ ।
जुलाई १४ मा कोपा अमेरिकाको फाइनलमा अर्जेन्टिनाले कोलम्बियामाथि जित हात पार्दा घुँडामा चोट लागेपछि मेसीले कुनै पनि खेल खेलेका छैनन् । गत महिना फ्लोरिडामा सम्पन्न कोपा अमेरिकाको फाइनल खेलमा घाइते भएका थिए ।
कीर्तिमानी रूपमा आठ पटकका बालोन डी’ओरका विजेता मेसी कोपा अमेरिका सकिएपछि इन्टर मियामीको प्रशिक्षणमा फर्किएका थिएनन् । जसकारण अर्जेन्टिनी प्रशिक्षक लियोनल स्कालोनीले फिफा विश्वकप छनोट खेल्ने टोलीको घोषणा गर्दा मेसीलाई समावेश गरेका थिएनन् ।
फिफा विश्वकप छनोटका दुई खेल गुमाउने थिए । अर्जेन्टिनाले सेप्टेम्बर ५ चिलीमाथि ३-० गोलको जित निकाल्दा कोलम्बियासँग भने २-१ गोलको हार बेहोरेको थियो ।
यता, क्लबका लागि भने उनले गत जुन महिनायता खेल्न पाएका छैनन् । तर मेजर लिग सकरअन्तर्गत भोलि बिहान हुने फिलाडेल्फियासँगको खेलमा भने उनी मैदान उत्रिन सक्ने सम्भावना छ ।
अमेरिकन लिगमा उनीआबद्ध मियामी २७ खेल खेलेर ५९ अंकका साथ शीर्ष स्थानमा छ । दोस्रो स्थानमा रहेको सिनसिनाटी मियामीभन्दा आठ अंकले पछाडि छ । मियामीका लागि १५ खेल खेल्दा १४ गोल र ११ गोलमा पास मिलाएका छन् ।
