२९ भदौ , एजेन्सी ।
साउदी प्रो लिगमा अल नासर हारबाट जोगिएको छ । अल अहलीका अल–हुरेजीले आत्मघाती गोल गर्न पुग्दा नासर हारबाट जोगिएको हो । नासरले अल अहलीसँग १–१ को बराबरी खेल्यो । अल–अवल पार्कमा सम्पन्न खेलमा अल अहलीका लागि फ्रान्क केइसीले गोल गर्दा नासरले भने १ गोल उपाहार स्वरुप पाएको थियो ।
अहलीका लागि ५७औं मिनेटमा केइसीले गोल गर्दै सुरुवाती अग्रता दिलाएका थिए । इन्ज्युरी समयमा अहलीका अल–हुरेजीले आत्मघाती गोल गर्न पुग्दा नासर हारबाट जोगियो । बराबरीसँगै नासर शीर्ष स्थानमा उक्लिने मौकाबाट चुकेको छ । ३ खेलबाट ५ अंक जोडेको नासर छैटौं स्थानमा छ ।
समान खेलबाट ४ अंक जोडेको अहली नवौं स्थानमा छ । उता करिम अदेयेमीको दुई गोलसँगै बोरुसिया डर्टमन्ड बुन्डेसालिगाको अंक तालिकामा शीर्ष स्थानमा उक्लिएको छ । सिग्नल इडुना पार्कमा शुक्रबार राति सम्पन्न खेलमा डर्टमुन्डले एफसी हेडेनहेममाथि ४–२ को सहज जित हात पारेको हो ।
जितसँगै डर्टमन्डले तीन खेलबाट सात अंक जोडेको छ, जुन दोस्रो स्थानको हेडेनहेमभन्दा एक अंक बढी हो । १२औं मिनेटमै करिमको पासमा गोल गर्दै डेनिएल मालेनले डर्टमुन्डलाई सुरुआती अग्रता दिलाएका थिए । त्यसको पाँच मिनेटपछि जुनियन ब्रान्डको पासमा करिमले नै गोल गरे ।
३९औं मिनेटमा उमर ट्रोरले बल दिँदै मार्विन पिरिङ्गरलाई गोल गर्ने अवसर दिए । त्योसँगै हेडेनहेम खेलमा २–१ ले फर्कियो । ४१औं मिनेटमा करिमले व्यक्तिगत दोस्रो र टोलीका लागि तेस्रो गोल गरे । उनले जुलियन रेयरसनको पासमा गोल गरेका हुन् ।
तर, ७४औं मिनेटमा म्याक्सिमलियियन ब्रुनिगले गोल गर्दै हेडेनहेमलाई ३–२ को स्थितिमा ल्याए । यद्यपि, इन्जुरी समयमा एमरे क्यानले पेनाल्टीमा गोल गर्दै डर्टमन्डलाई ४–२ को सहज जित दिलाए । यसैबीच इतिहाद स्टेडियममा आज राति बे्रन्टफोर्डले म्यानचेस्टर सिटीको सामना गर्दैछ ।
मैदानमा उत्रिने तयारीमा रहेका बेला ब्रेन्टफोर्डका म्यानेजर थोमस फ्रान्कले एर्लिङ हालान्डको प्रत्याशा र मुभमेन्टका कारण म्यानचेस्टर सिटीलाई रोक्न असम्भव भएको बताएका छन् । प्रिमियर लिगको पछिल्लो दुई सिजनका हालान्ड सर्वाधिक गोलकर्ता हुन् ।
यस सिजन तीन खेलमा दुई ह्याट्रिकसहित उनले सात गोल गरिसकेका छन् । प्रिमियर लिगमा ६९ खेलमा ७० गोल गरेका २४ वर्षे खेलाडीलाई कसरी रोक्न सकिन्छ भन्ने प्रश्नमा फ्रान्कले भने, ‘लगभग असम्भव जस्तै छ। धेरै टिमले उनलाई रोक्ने प्रयास गरेका छन् । उनी उत्कृष्ट खेलाडी हुन्।’
हालान्डले गत सिजन ब्रेन्टफोर्डको जीटेक कम्युनिटी स्टेडियममा फिल फोडेनले गरेका तीन गोलमध्ये एकगोलका लागि असिस्ट गरेका थिए । प्रिमियर लिगमा शनिबार राती ६ खेल हुँदैछन् ।
