२९ भदौ, काठमाडौं ।
एन्फा महिला लिगअन्तर्गत कोशी प्रदेशले आफ्नो पाँचौं खेल खेल्दै छ । त्रिपुरेश्वरस्थित दशरथमा शनिबार हुने खेलमा कोशीले संकटा फुटबल क्लबसँग खेल्न आँटेको हो ।
अपराह्न ४ः१५ बजेबाट सुरु हुने उक्त खेलमा कोशी पुनः शीर्ष स्थानमा फर्किने दाउमा हुने छ । लगातार तीन जित निकालेको कोशीको बुधबार मात्र अपराजित यात्रामा ब्रेक लागेको थियो ।
विभागीय टोली नेपाल पुलिस क्लबसँग ४-० गोलले हारेसँगै कोशी प्रदेशको अपराजित यात्रामा ब्रेक लागेको हो । कोशीले महिला लिगको उद्घाटन खेलमा स्याङ्जाको वालिङ नगरपालिलाई ४–० गोलले हराएको थियो । दोस्रो खेलमा कोशीले बागमती युवा क्लबलाई २–१ गोलले पराजित गरेको थियो भने तेस्रो खेलमा कर्णाली प्रदेशलाई ४–० ले हराएको थियो ।
कोशीले पहिलोपल्ट विभागीय टोलीसँग प्रतिस्पर्धा गरेको थियो । चार खेलको समाप्तीमा कोशी नौ अंक जोड्दै चौथो स्थानमा छ, जुन शीर्ष स्थानमा रहेको एपिएफको भन्दा एक अंक कम हो ।
संकटाले भने जारी प्रतियोगितामा अझै लय समात्न सकेको छैन । संकटाले एक जित, तीन हार बेहोरेको छ । अंक तालिकाको सातौं स्थानमा रहेको संकटाले कर्णालीलाई मात्रै पराजित गर्न सकेको हो ।
