३० भदौ, एजेन्सी ।
फ्रान्सका विश्वकप विजेता ओसमान डेम्बेले चम्किएको खेलमा पेरिस सेन्ट जर्मेन (पिएसजी) ले जित आत्मसात् गरेको छ । फ्रेन्च लिग वानअन्तर्गत शनिबार राति भएको खेलमा पिएसजीले ब्रेस्टमाथि ३-१ गोलको जित निकालेको हो ।
साविक विजेतासमेत रहेको पिएसजीको यो लगातार चौथो जित हो । जितसँगै अंक तालिकामा शीर्ष स्थानमा रहेको पिएसजीले १२ अंक जोडेको छ । ऊ दोस्रो स्थानको मार्सेलीभन्दा दुई अंकले अगाडि छ ।
गएराति घरेलु मैदानमा पिएसजीलाई जिताउन ओसमान डेम्बेलेले दुई गोल गर्दा फाबियन रुइजले एक गोल गरे । पाहुना टोलीका रोमेन डेल कास्टिलोले गरेको गोल सान्त्वना बन्यो ।
खेलको २९औं मिनेटमा कास्टिलोले पेनाल्टीमा गरेको गोल मार्फत् पाहुना टोलीले सुरुआती अग्रता दिलाएको थियो । तर, ४२औं मिनेटमा डेम्बेलेले गोल गर्दै घरेलु टोलीलाई खेलमा फर्काएका थिए ।७३औं मिनेटमा रुइजले गोल गरेपछि अग्रता बनाएको पिएसजीका लागि ७४औं मिनेटमा डेम्बेलेले अर्को गोल थपे । डेम्बेलेको व्यक्तिगत दोस्रो गोलसँगै पिएसजी ३-१ गोलले विजयी भएको हो ।
यससँगै डेम्बेलेले चार खेलमा तीन गोल र तीन असिस्ट गरेका छन् । गत वर्षमात्र बार्सिलोनाबाट अपेक्षाअनुसार मौका नपाएर उनी फ्रान्स आएका थिए ।
