३० भदौ, एजेन्सी ।
इंग्लिस प्रिमियर लिगकै खराब मानिएको खेलमा चेल्सीले बर्नमाउथमाथि जित निकालेको छ । इंग्लिस प्रिमियर लिगको इतिहासमै सर्वाधिक धेरै पहेँलो कार्ड प्रयोग भएको खेलमा चेल्सीले बर्नमाउथलाई १-० गोलले हराएको हो ।
बर्नमाउथको मैदान भिटालिटी स्टेडियममा शनिबार राति भएको खेलमा जम्मा १४ वटा पहेँलो कार्ड देखाइएको थियो । पाहुना टोली चेल्सीका आठ र बर्नमाउथका ६ खेलाडीले पहेँलो कार्ड पाउँदा चेल्सीका प्रशिक्षक एन्जो मारेस्काले पनि पहेँलो कार्डको सामना गर्नुपर्यो ।
तथापि, कुनै पनि खेलाडीले रातो कार्ड नपाएका कारण पनि दुवै टोलीका ११-११ खेलाडी मैदानमा थिए । उक्त खेलमा चेल्सीका क्रिस्टोफर एनकुन्कुले निर्णायक गोल गरेका थिए । खेल सकिन करिब चार मिनेट बाँकी छँदा उनले गरेको गोल नै चेल्सीको जितमा निर्णायक बनेको थियो ।
जितसँगै सातौं स्थानको चेल्सीले चार खेलमा सात अंक जोडेको छ । बर्नमाउथ भने पाँच अंकका साथ ११औं स्थानमा छ ।
