३० भदौ, काठमाडौं ।
नेकपा माओवादी केन्द्रका उपमहासचिव तथा पूर्वअर्थमन्त्री वर्षमान पुनले प्रधानमन्त्री तथा नेकपा एमालेका अध्यक्ष केपी शर्मा ओलीलक्षित अभिव्यक्ति दिएका छन् ।
यसअघि शनिबार एमाले केन्द्रीय कार्यालयको आयोजना र जनसंगठन समन्वय संयन्त्रको व्यवस्थापनमा आयोजित ‘स्थानीय तहमा जनसंगठन सुदृढीकरण’ विषयक राष्ट्रिय कार्यशालाको उद्घाटन गर्दै ओलीले माओवादीप्रति व्यङ्ग्योक्तिपूर्ण अभिव्यक्ति दिएका थिए ।
ओलीले आगामी निर्वाचनमा माओवादी केन्द्रलाई राष्ट्रिय पार्टी बन्न सकस रहेको भन्दै माओवादीले मुस्किलले चारदेखि पाँच लाख मत पाउन सक्ने अनुमान गरेका थिए । माओवादी केन्द्रको मत घट्दो रहेको र आउँदो निर्वाचनमा चार पाँच लाखसम्ममा झर्ने उनको अनुमान थियो ।
त्यसैलाई लक्षित हुँदै उपमहासचिव पुनले एमाले र उसँग सत्ता सहकार्य गरिरहेको नेपाली कांग्रेस विकृतिका डंगुर भएको बताएका हुन् ।पोस्टबहादुर बोगटी स्मृति दिवसका अवसरमा आयोजित कार्यक्रममा नेता पुनले यस्तो बताएका हुन् ।
एजेन्डा र विचारको हिसाबले माओवादी नै देशको पहिलो पार्टी भएको भन्दै अहिले जनतामा माओवादी पार्टीको ग्राफ बढिरहेको उनको दाबी छ । माओवादीले २०८४ को निर्वाचनमा जित निकाल्ने बताउँदै उनले कांग्रेस र एमाले विस्तारै कमजोर बन्दै गएको दाबी गरे ।
‘एकथरि मान्छेले ८४ को निर्वाचनलाई लिएर संख्या गनिरहेका छन्, हाम्रो साइज सानो हुन्छन् भनिरहेका छन् । यथार्थमा हाम्रा आठ लाख जति सदस्य छन्, एमाले र कांग्रेसका १०, १२ लाखको दाबी छ । यसरी हामी एकैखालमा छौँ, जनतामा जाँदा । बरु माओवादीको ग्राफ बढिरहेको छ र कांग्रेस र एमालेजस्ता पूराना संसवादी विकृतिका डंगुर हुन् भनिरहेका छन् । आज सामाजिक कार्यक्रममा जाँदा प्रधानमन्त्रीको विरोध किन भइरहेको छ ? छेउमा भ्रष्टाचारीलाई राखेर म भ्रष्टाचार गर्दिनँ भन्दा जनताले पत्याएनन्,’ उनले भने ।
