३० भदौ, एजेन्सी ।
चोटका कारण दुई महिना मैदानबाहिर रहेर पुनरागमन गरेको खेल नै अर्जेन्टिनी कप्तान लियोनल मेसीका लागि सम्झनलायक बन्यो । अमेरिकन मेजर लिग सकरअन्तर्गत आइतबार बिहान भएको खेल मेसीआबद्ध इन्टर मियामीले फिलाडेल्फियालाई ३–१ गोलले हराएको थियो ।
मियामीको मैदान चेस स्टेडियममा कप्तान मेसीले दुई गोल गरेका थिए भने लुइस स्वारेजले एक गोल गरे । पाहुना टोली फिलाडेल्फियाका माइकल उरेले दोस्रो मिनेटमा गोल गर्दै अग्रता दिलाएको खेलमा बार्सिलोनाका पूर्वखेलाडीद्वय मेसी र स्वारेजले मियामीलाई जिताएका थिए ।
चार मिनेटको अन्तरालमा दुई गोल गरेका मेसीले स्वारेजको गोलमा पास मिलाइदिएका थिए । यससँगै ३७ वर्षीय मेसीले मेजर सकर लिग (एमएलएस) मा नयाँ कीर्तिमान बनाएका छन् । उनी मेजर लिगका पछिल्ला आफूले खेलेका १९ खेलमा १५ गोल र १६ असिस्ट गर्ने पहिलो खेलाडी बनेका हुन् ।
मेसीले जारी सिजनमा १३ मात्र खेल खेल्दा १४ गोल र १० असिस्ट गरेका छन् । सन् २०२४ मा उनले मियामीका सबै प्रतियोगितामा गरी २९ खेलमा २५ गोल गर्दा १६ गोलमा पास मिलाएका छन् । यसअघि बार्सिलोना र पिएसजीका लागि खेलेका मेसीले सबै क्लबमा ७३१ गोल र ३२० असिस्ट गरेका छन् । समग्र फुटबल करिअरमा ८४० गोल गरेका मेसीले ३७५ गोलमा पास मिलाइदिएका छन् ।
सर्वाधिक आठ पटकका बालोन डी‘ओर विजेता मेसीले चोटका कारण जुलाई १४ देखि १४ सेप्टेम्बरसम्म दुई महिना विश्राम लिनुपरेको थियो । विश्वकप विजेता मेसी गत महिना फ्लोरिडामा सम्पन्न कोपा अमेरिकाको फाइनल खेलमा घाइते भएका थिए । जुलाई १४ मा कोपा अमेरिकाको फाइनलमा अर्जेन्टिनाले कोलम्बियामाथि जित हात पार्दा घुँडामा चोट लागेपछि मेसीले कुनै पनि खेल खेलेका थिएनन् ।त्यसबीचमा उनले फिफा विश्वकपको दक्षिण अमेरिकी छनोटतर्फका दुई खेल गुमाएका थिए । अर्जेन्टिनाले सेप्टेम्बर ५ चिलीमाथि ३–० गोलको जित निकाल्दा कोलम्बियासँग भने २–१ गोलको हार बेहोरेको थियो । खेलको अघिल्लो दिनदेखि नै प्रशिक्षणमा फर्किएका मेसीले दुई गोल गरेर उक्त कीर्तिमान बनाएका हुन् ।
‘इमान्दारिताका साथ भन्नुपर्छ, मियामीका लागि खेल्न नपाउँदा म थोरै थकित थिएँ,’ खेलपछि मेस्सीले भनेका छन्, ‘पुनरागमनका लागि मैले थुप्रै कोसिस गरेँ । धेरै समय म मैदानभन्दा टाढा रहेँ । तर विस्तारै समूहमा रहेर प्रशिक्षण थालेको थिएँ । अहिले राम्रो महसुस भइरहेको छ, मैले गेमको सुरुआत गर्ने राम्रै निर्णय लिएको रहेछु ।’
२०२२–२३ को सिजन आधाभन्दा धेरै खेलहरू सकिएपछि मेसी मियामीमा अनुबन्ध भएका थिए । उक्त सिजन डेभिड बेह्यामको क्लब मियामीलाई एमएलएसको उपाधि जिताउन नसकेका मेसीले यसपटक भने दाबेदार बनाएका छन् ।
अहिले २८ खेल खेलिसक्दा मियामी ६२ अंकका साथ शीर्ष स्थानमा छ । समान खेल खेलेको सिनसिनाटी मियामीभन्दा १० अंकले पछाडि छ ।
