३० भदौ, एजेन्सी ।
तिहाड जेलमा १५६ दिन बिताएर दुई दिनअघि मात्र रिहा भएका दिल्लीका मुख्यमन्त्री अरविन्द केजरीवालले राजीनामाको घोषणा गरेका छन् । भारतको सर्वोच्च अदालतबाट जमानत पाएसँगै केजरीवाल शुक्रबार रिहा भएका थिए ।
धरौटीमा जेलबाट रिहा भएको दुई दिनपछि नै केजरीवालले पदबाट राजीनामा दिने घोषणा गरेका छन् । भारतीय मिडिया आजतकका अनुसार आइतबार आम आदमी पार्टीको कार्यालयमा कार्यकर्तालाई सम्बोधन गर्दै केजरीवालले मुख्यमन्त्री पदबाट राजीनामा दिने घोषणा गरेका हुन् ।
उनले भने, ‘म सिएम (मुख्यमन्त्री) बाट राजीनामा दिँदै छु र जनताको फैसला नआएसम्म म सीएमको कुर्सीमा बस्ने छैन । म जनताको बीचमा जान्छु, हरेक गल्लीमा जान्छु, घरघरमा जान्छु र जनताले केजरीवाल इमान्दार छन् भन्ने फैसला नगरेसम्म म मुख्यमन्त्रीको कुर्सीमा बस्ने छैन ।’
केजरीवालले भने, ‘केन्द्रीय सरकारले कानुन बनाएर मेरो काम बन्द गर्ने काेसिस गरेको थियो । यदि, तपाईंहरूलाई लाग्छ, केजरीवाल इमान्दार छ । त्यस्तो लाग्छ भने मेरो पक्षमा भोट दिनुस् । फेब्रुअरीमा चुनाव हुँदै छ । तर चुनाव तुरुन्तै गराइयोस् भन्ने मेरो माग छ । नोभेम्बरमा महाराष्ट्रमा चुनाव होस् । नयाँ सिएमको चुनाव त्यसभन्दा दुई-तीन दिनपछि होस् ।’मदिरा नीतिमा भ्रष्टाचार गरेको आरोपमा तिहाड जेलमा रहेका केजरीवाल भारतीय सर्वोच्च अदालतले धरौटीमा रिहाको आदेश दिएपछि गत शुक्रबार साँझ जेलमुक्त भएका थिए ।
