३० भदौ, एजेन्सी ।
फुटबल संघ (एफए)ले इंग्लिस प्रिमियर लिग क्लब चेल्सी र बर्नमाउथलाई २५ हजार पाउन्डको जरिवाना तिराउने भएको छ । ६ वटा भन्दी बढी पहेँलो कार्ड लिएको भन्दै दुवै क्लबलाई एफएले जरिवाना तिराउने भएको अन्तर्राष्ट्रिय मिडियाहरूले जनाएका छन् ।
शनिबार राति चेल्सी र बर्नमाउथसँगको खेल प्रिमियर लिग इतिहाकै खराब मानिएको छ । इंग्लिस प्रिमियर लिगको इतिहासमै सर्वाधिक धेरै पहेँलो कार्ड प्रयोग भएको खेलमा चेल्सीले बर्नमाउथलाई १-० गोलले हराएको थियो ।
बर्नमाउथको मैदान भिटालिटी स्टेडियममा शनिबार राति भएको खेलमा जम्मा १४ वटा पहेँलो कार्ड देखाइएको थियो । खेलका रेफ्री एन्थोनी टेलरले पाहुना टोली चेल्सीका आठ र बर्नमाउथका ६ खेलाडीलाई पहेँलो कार्ड दिएका थिए ।
यस्तै, चेल्सीका प्रशिक्षक एन्जो मारेस्काले पनि पहेँलो कार्डको सामना गर्नुपरेको थियो । तथापि, कुनै पनि खेलाडीले रातो कार्ड नपाएका कारण पनि दुवै टोलीका ११-११ खेलाडी मैदानमा थिए ।
उक्त खेलमा चेल्सीका क्रिस्टोफर एनकुन्कुले निर्णायक गोल गरेका थिए । खेल सकिन करिब चार मिनेट बाँकी छँदा उनले गरेको गोल नै चेल्सीको जितमा निर्णायक बनेको थियो ।
जितसँगै सातौं स्थानको चेल्सीले चार खेलमा सात अंक जोडेको छ । बर्नमाउथ भने पाँच अंकका साथ ११औं स्थानमा छ ।
