३१ भदौ, विराटनगर ।
बार्सिलोनाले नयाँ सिजनको स्पेनिस ला लिगामा लगातार पाँचौं जित दर्ता गरेको छ । आइतबार राति भएको खेलमा बार्सिलोनाले जिरोनामाथि ४-१ गोलको जित निकालेको हो ।
जिरोनाको मैदान मोन्टिल्भीमा भएको खेलमा बार्सिलोनालाई जिताउन लामिन यामलले दुई गोल गरे भने डेनी ओल्मो र पेड्रीले एक-एक गोल गरे । जिरोनाका क्रिस्टियन स्टौनीले एक गोल फर्काए ।
खेलको ३०औं मिनेटमा लामिनले गोल गर्दै बार्सिलोलाई सुरुआती अग्रता दिलाए । त्यसको सात मिनेट नबित्दै दोस्रो गोल गर्दै लामिनले बार्सिलोनाको अग्रता दोब्बर बनाए ।
४७औं मिनेटमा ओल्मो र ६४औं मिनेटमा पेड्रीले गोल गरेपछि बार्सिलोनाले ४-० गोलको अग्रता बनाएको थियो । खेलको ८०औं मिनेटमा जिरोनाका क्रिस्टियन स्टौनीले एक गोल फर्काए । ८६औं मिनेटमा फेरान टोरेसले रातो कार्ड खाँदै मैदानबाट बाहिरिएपछि बार्सिलोना १० खेलाडीमा सीमित बनेको थियो ।जितसँगै बार्सिलोनाले गत सिजन जिरोनासँग हारेको बदला लिएको छ । पाँच खेलमा शतप्रतिशत जित निकालेको बार्सिलोनाले १५ अंक जोडेको छ । शीर्ष स्थानको उसले साविक विजेता रियल मड्रिडलाई चार अंकले उछिनेको छ ।
