३ असोज , एजेन्सी ।
विश्वकप विजेता अर्जेन्टिना विश्व फुटबलको सर्वोच्च निकाय फिफा वरीयताको शीर्ष स्थानमा कायमै रहेको छ । फिफाले बिहीबार अद्यावधिक गरेको नयाँ वरीयताअनुसार अर्जेन्टिनाले १८८९.०२ अंकसहित शीर्ष स्थानमा कब्जा जमाएको हो ।
दुई वर्षअघि कतारमा भएको फिफा विश्वकप जितेयता अर्जेन्टिना वरीयताको शीर्ष स्थानमा कायमै छ । फिफाको सेप्टेम्बर विन्डोमा चिलीलाई ३–० हराउँदा कोलम्बियासँग २–१ ले पराजित भएको थियो ।
वरीयताको दोस्रोदेखि १०औँ स्थानसम्म परिवर्तन भएको छ । नयाँ अद्यावधिक वरीयताअनुसार फ्रान्स दोस्रो, स्पेन तेस्रो, इंग्ल्यान्ड चौथो र ब्राजिल पाँचौँ स्थानमा छन् । यस्तै, बेल्जियम छैटौँ, नेदरल्यान्ड्स सातौँ, पोर्चुगल आठौँ, कोलम्बिया नवौँ र इटाली १०औँ स्थानमा छन् ।
एसियाली वरीयतामा भने जापान शीर्ष स्थानमा छ । विश्व वरीयतामा भने जापान १६औँ स्थानमा छ । वरीयतामा नेपाल एक स्थान तल झर्दै १ सय ७६ औं स्थानमा रहेको छ । छिमेकी भारत भने १सय २६ औं स्थानमा रहेको छ ।
अफगानिस्तान समेत नेपाल भन्दा माथि रहेको छ । अफगान वरीयतामा १ सय ५२ औं स्थानमा रहेको छ । दक्षिण एसियाली राष्ट्रहरुमा माल्दिभ्स नेपालभन्दा माथि १ सय ६३ औं स्थानमा रहेको छ भने बंगलादेश, भुटान र पाकिस्तान भने पछाडि रहेका छन् । विश्व वरीयतामा सान मारिनो सबैभन्दा पुछारमा रहेको छ ।
