४ असोज , काठमाण्डौ ।
प्रधानमन्त्री केपी शर्मा ओली संयुक्त राज्य अमेरिकामा जारी संयुक्त राष्ट्रसंघको महासभामा भाग लिन आज अमेरिका प्रस्थान गर्ने भएका छन् । न्यूयोर्कस्थित संयुक्त राष्ट्रसङ्घको मुख्यालयमा भइरहेको संयुक्त राष्ट्रसङ्घ महासभाको ७९औँ अधिवेशनमा भाग लिन नेपाली प्रतिनिधिमण्डलको नेतृत्व गर्दै उनी आज त्यसतर्फ प्रस्थान गर्ने भएका हुन् ।
उनले असोज १० गते संयुक्त राष्ट्रसङ्घको महासभालाई सम्बोधन गर्ने कार्यक्रम रहेको परराष्ट्र मन्त्रालयले जनाएको छ । महासभाको यस वर्षको साधारण बहस ‘कोही पनि पछाडि नछोडिनेः वर्तमान र भावी पुस्ताका लागि शान्ति, दिगो विकास र मानव मर्यादाको विकासका लागि मिलेर काम गर्ने’ विषय रहेको छ ।
प्रधानमन्त्री ओली असोज ८ गते महासभाको साधारण बहसको उद्घाटनसत्र र असोज ९ गते अमेरिकाका राष्ट्रपति जो बाइडेनले आयोजना गर्ने स्वागत समारोहमा सहभागी हुनेछन् । न्युयोर्कमा रहँदा प्रधानमन्त्री ओलीले अतिकम विकसित देशहरूको ग्लोबल समन्वय ब्यूरोको अध्यक्षका रूपमा सम्मेलनलाई पनि सम्बोधन गर्ने मन्त्रालयले जनाएको छ ।
साथै उहाँले समुद्री सतह वृद्धिबाट उत्पन्न अस्तित्व खतरा विषयक समूहगत उच्चस्तरीय बैठक र ‘एन्टिमाइक्रोबियल’ प्रतिरोध विषयक उच्चस्तरीय बैठकलाई पनि सम्बोधन गर्नेछन् ।
प्रधानमन्त्री ओलीले कोलम्बिया विश्वविद्यालयमा असोज ७ गते आयोजना हुने ‘नेपालको प्रजातन्त्र र आर्थिक समृद्धिको यात्रा’ विषयमा सम्बोधन गर्नुका साथै असोज ११ गते हुने हार्वर्ड विश्वविद्यालयमा जोन एफ केनेडी जुनियर फोरममा ‘नेपालको परिप्रेक्षः सङ्क्रमणकालीन न्यायबाट जलवायु न्याय’ विषयक कार्यक्रमलाई पनि सम्बोधन गर्ने कार्यतालिका छ ।
उनले भ्रमण क्रममा संयुक्त राष्ट्रसङ्द्धघका महासचिव एन्टोनियो गुटेरेससँग भेटघाट गर्नुका साथै द्विपक्षीय वार्तासमेत गर्ने तालिका छ । प्रधानमन्त्री ओलीका साथमा उहाँकी धर्मपत्नी राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका प्रमुख सल्लाहकार विष्णुप्रसाद रिमाल, परराष्ट्र सचिव सेवा लम्साल र नेपाल सरकारका वरिष्ठ अधिकारीहरू हुनेछन् ।
यद्यपि आरजु भने अहिले क्यानडाको भ्रमणमा रहेकाले उनी त्याहाबाटै अमेरिका प्रस्थान गर्ने कार्यक्रम रहेको छ । उनले अमेरिका भ्रमणका क्रममा देशको शिर झुक्ने गरी कुनैपनि निर्णय नगरिने प्रतिवद्धता जनाएका छन् । उनले महासभामा छिमेक सम्बन्धका विषयमा पनि कुरा राख्ने बताएका छन् ।
‘नेपाल सार्वभौमसत्ता सम्पन्न र स्वाधीन राष्ट्र हो,’ प्रधानमन्त्री ओलीले भने, ‘यसले आफ्नो राष्ट्रिय गौरव अझ माथि उठाउनेछ । आफ्ना जायज राष्ट्रिय हितहरू अन्तर्राष्ट्रिय उत्तरदायित्वभित्र रहेर पूरा गर्ने, रक्षा गर्ने र संवर्धन गर्ने र आफ्नो राष्ट्रिय हित तलमाथि पर्न नदिने कुरामा नेपालको प्रतिबद्धता रहन्छ।’
असल र जिम्मेवार छिमेकीको रूपमा नेपाल रहेको र अरूबाट पनि त्यस्तै अपेक्षा रहेको पनि उनले संसदमा बताएका छन् । उनले भने, ‘नेपाल असल छिमेकीको रुपमा छिमेक सम्बन्ध कायम गर्न चाहन्छ । छुद्र र जाली छिमेकी होइन । छिमेकीको अहित चिताउने छिमेकीको रुपमा होइन।
छिमेकीको हित चिताएर काम गर्ने छिमेकीको रुपमा बस्न चाहन्छ र त्यस्तै व्यवहार छिमेकीहरूबाट पनि चाहन्छ । प्रधानमन्त्री ओलीले आफूहरूले देश र जनताको लागि राजनीति गर्ने, आजका लागि र त्योभन्दा बढी भोलिका लागि राजनीति गर्ने भएकाले यस तथ्यलाई मनन् गरेर अन्तर्राष्ट्रिस्तरमा प्रतिनिधित्व गर्ने बताएका छन् । प्रधानमन्त्री ओली असोज १४ गते स्वदेश फर्किनेछन् ।
