६ असोज, काठमाण्डौ ।
एसिया सिनियर करातें च्याम्पियनसिपमा फाइनलमा पुगेर ऐतिहासिक कीर्तिमान बनाएकी नेपालकी एरिका गुरुङले रजत पदक जितेकी छन् । चीनको हाङ्जाउमा भएको च्याम्पियनसिपको ६८ केजी माथि तौल समुहको फाइनलमा खेलमा भियतनामकी खेलाडीसँग ६–० ले पराजित भएकी हुन् ।
उनले प्राप्त गरेको रजत पदक पनि नेपालका लागि ऐतिहासिक पदक हो । २०औं एसिया सिनियर करातें च्याम्पियनसिपमा फाइनलमा भियतनामकी नाओन थि नुयेनसँग पराजित हुँदै गुरुङ रजत पदकमा सीमित भएकी छिन् ।
एसियन कराते फेडरेसनले आयोजना गर्ने एसियन च्याम्पियनसिपमा नेपालले जितेको यो पहिलो पदक हो । अहिलेसम्म कुनै पनि नेपाली खेलाडीले एसियन सिनियर च्याम्पियनसिपमा पदक जिन सकेका थिएनन् ।
प्रि क्वाटरफाइनलमा फिलिपिन्सकी इसाबेल अरियन्ने ब्रिटोलाई ४–० ले पराजित गरेकी एरिकाले क्वाटरफाइनलमा सोफिया बेरुल्टसेभालाई हराएकी थिइन् । १९औं एसियन गेम्समा उनैसँग पराजित हुँदै रजतमा चित्त बुझाएकी एरिकाले उनै खेलाडीलाई हराउँदै सेमिफाइनल प्रवेश गरेकी थिइन् ।
उनले सेमिफाइनलमा थाइल्याण्डकी केवलिन सोङगलिनलाई ८–० ले हराउँदै फाइनलमा स्थान बनाउँदै फाइनल पुगेकी थिइन् । करिब एक वर्षअघि चीनको हाङझावस्थित स्पोर्टस् सेन्टर जिम्न्याजिममा एरिकाले १९ औं एसियाली खेलकुदमा नेपाललाई रजत पदक दिलाएकी थिइन् ।
सो रजत एसियाली खेलकुदमा कराँते खेलाडीले प्राप्त गरेको अहिलेसम्मकै बृहत् सफलता हो । एसियन च्याम्पियनसिपमा एरिकासहित ११ खेलाडीले नेपालबाट प्रतिस्पर्धा गरेका छन् । एरिकाले २०औँ एसियन च्याम्पियनसिपमा ६८ केजीमाथि तौलसमूहमा प्रतिस्पर्धा गरेकी हुन् ।
एसियाली सिनियर कराँतेमा नेपाल हालसम्म पदकविहीन थियो । हाङझावमा पदक विजेता खेलाडीहरूलाई राखेपले सु्विधासहित रणनीतिक तयारीका लागि राष्ट्रिय टिममा समावेश गर्ने राखेपका सदस्य सचिव टंकलाल घिसिङले यसअघि नै प्रतिबद्धता जनाइसकेका छन् । अब यो सुविधा एरिकाले पाउने छिन् ।
