१० असोज ,एजेन्सी ।
गाजापट्टीलाई धुलोपिठो पारेपछि अब इजरायली सेना लेबनान कुच गर्न अघि बढेको छ । उसले लेबनानमै प्रवेश गरेर आक्रमण गर्ने सम्भावना बढेको छ । इजरायली सेना प्रमुखले नै त्यस्तो संकेत गरेका छन् ।
उनले आफ्ना सैनिकहरूलाई भनेका छन– हिजबुल्लाहविरुद्धको हवाई आक्रमणले शत्रुको क्षेत्रमा प्रवेश गर्ने बाटो खोल्न सक्छ । लेफ्टिनेन्ट जनरल हजरी हेलेवीले अगाडि भनेका छन– दिनभर हमला गरिरह्यौँ।
यसको उद्देश्य लेबनानमा प्रवेशको लागि सम्भावित बाटो खोल्नु र हिजबुल्लाहलाई लक्ष्य गर्नु हो । लेबनानका स्वास्थ्यमन्त्रीले हिजो सेप्टेम्बर २५ मा भएको हवाई हमलामा ५० जनाको मृत्यु भएको बताएका छन् ।
इजरायलका अनुसार यी आक्रमणमा हिजबुल्लाहको गुप्तचर निकाय, लन्चर र हतियार भण्डारण स्थललाई निशाना बनाइएको थियो । यो बढ्दो द्वन्द्व रोक्न कूटनीतिक तहमा पहल भइरहेको छ ।
फ्रान्स र अमेरिकाले २१ दिने युद्धविरामको प्रस्ताव गरेका छन् । अमेरिका, युरोपेली संघ र बेलायतजस्ता सहयोगी राष्ट्रहरूले लेबनान र हिजबुल्लाहबीच अस्थायी युद्धविराम कार्यान्वयन गर्न माग गरेका छन् ।
यो संयुक्त विज्ञप्तिअनुसार युद्ध सहन नसकिने र यसले स्थिति बिग्रने छ, जसबाट इजरायल वा लेबनान दुवैलाई कुनै फाइदा हुने छैन । जुन संयुक्त विज्ञप्तिमा अमेरिका, अष्ट्रेलिया, क्यानडा, युरोपेली संघ, फ्रान्स, जर्मनी, इटाली, जापान, साउदी अरब, संयुक्त अरब इमिरेट्स, बेलायत र कतारले हस्ताक्षर गरेका छन् ।
यसबीच लेबनानका विभिन्न स्थानमा इजरायलको आक्रमणमा थप ७२ जनाको मृत्यु भएको छ । लेबनानको स्वास्थ्य मन्त्रालयका अनुसार यससँगै इजरायलको बम विस्फोटमा परी मृत्यु हुनेको संख्या कम्तीमा ६२० पुगेको छ ।
इजरायलको ठूलो बमबारी अभियानबाट करिब पाँच लाख मानिस विस्थापित भएको हुन सक्ने अनुमान गरिएको लेबनानका विदेशमन्त्रीलाई उद्धृृत गर्दै अलजजिराले जनाएको छ । इजरायलले यसअघि गत सोमबार हिजबुल्लाहविरुद्ध सबैभन्दा ठूलो हवाइ आक्रमण गरेको थियो ।
आक्रमणमा ५०० भन्दा बढीले ज्यान गुमाएका थिए भने १ हजार ६०० भन्दा बढी घाइते भएका थिए । यसबीच मंगलबारमात्रै इरानका राष्ट्रपति मसूद पेजेस्कियनले हिजबुल्लाह इजरायल आक्रमणविरुद्ध एक्लै खडा हुन नसक्ने बताएका थिए ।
“पश्चिमी मुलुक, युरोपेली देश र संयुक्त राज्य अमेरिकाबाट सुरक्षा र समर्थन प्राप्त भइरहेको देशविरुद्ध हिजबुल्लाह एक्लै खडा हुन सक्दैन,” पेजेस्कियनले सीएनएनसँगको अन्तर्वार्तामा भनेका छन् ।
उनले ’लेबनानलाई अर्को गाजा बन्न नदिन’ अन्तर्राष्ट्रिय समुदायलाई आह्वान गरेका छन् । इरानले संयुक्त राष्ट्र सुरक्षा परिषद्लाई इजरायलविरुद्ध ’तत्काल कारबाही गर्न’ आह्वान गरेको छ ।
“इरान उदासीन रहनेछैन,” विदेशमन्त्री अब्बास अराघचीले सामाजिक सञ्जाल एक्समा भने, “हामी लेबनान र प्यालेस्टाइनका जनताको साथमा उभिएका छौँ ।” संयुक्त राष्ट्र संघको वार्षिक महासभाका लागि न्युयोर्क भ्रमणमा रहेका पेजेस्कियनले इजरायललाई युद्धोन्मादको आरोप लगाएका छन् ।
“यदि मध्यपूर्वमा ठुलो युद्ध भयो भने यसले विश्वव्यापी रूपमा कसैलाई फाइदा पु¥याउने छैन भन्ने कुरा हामी सबैलाई राम्रोसँग थाहा छ,” पेजेस्कियनले गोलमेज सम्मेलनमा सञ्चारकर्मीलाई भने, “इजरायलले व्यापक द्वन्द्वको अवस्था सिर्जना गर्न खोज्दैछ ।”
इरानले विगत १०० वर्षमा कहिल्यै युद्ध सुरु नगरेको उनले बताए । तर, कसैलाई पनि इरानी सुरक्षा र क्षेत्रीय अखण्डतालाई खतरामा पु¥याउने अनुमति नभएकोमा उनले जोड दिए ।
