१० वैशाख , काठमाण्डौ ।
करिब १० महिनापछि प्रतिबन्ध फुकुवा गरेपछि सामाजिक सञ्जाल टिकटकले नेपाल सरकारलाई धन्यवाद दिएको छ। टिकटक साउथ एसियाका पब्लिक पोलिसी तथा गभर्मेन्ट रिलेसन हेड फेरडुइस मोक्ताकिनले एक नोट पठाउँदै प्रधानमन्त्री केपी शर्मा ओलीलाई धन्यवाद दिएको छ ।
टिकटक साउथ एसियाले मुख्यसचिव एकनारायण अर्यालमार्फत् प्रधानमन्त्री ओलीलाई धन्यवाद नोट पठाएको टिकटकले एक विज्ञप्ति जारी गरेर जानकारी दिएको छ। टिकटकले अर्बौं मानिसहरूलाई स्वतन्त्रता अभिव्यक्त गर्न दिएको विज्ञप्तिमा उल्लेख छ।
त्यस्तै टिकटकले रचनात्मक अर्थतन्त्रको काम गर्ने पनि जनाइएको छ। टिकटकमाथिको प्रतिबन्ध खारेजले नेपाली नागरिकका लाथि आर्थिक अवसरहरू मात्र होइन, रचनात्मक अभिव्यक्तिको स्वतन्त्रतालाई पनि सुनिश्चित गरेको टिकटकले जनाएको छ।
ग्राहकहरूको सुरक्षालाई उच्च प्राथमिकतामा राखेको भन्दै टिकटकले प्रधानमन्त्री ओलीलाई सम्बन्धित सरकारी निकायहरूसँग सक्रिय रूपमा सहकार्य गरिरहेको जानकारी दिएको छ।
२०८० कात्तिक २७ गते टिकटकमाथि लगाइएको प्रतिबन्ध ओली नेतृत्वको सरकनरले भदौ ६ गते फुकुवा गरेको थियो। शर्तसहित प्रतिबन्ध हटाउने सरकारको निर्णयपछि टिकटकका प्रतिनिधिहरु काठमाडौं आएर सरकारले राखेका शर्तहरु स्वीकार गरेका थिए ।
सामाजिक सद्भाव खलबल्याएको भन्दै सरकारले २७ कात्तिक २०८० मा टिकटक बन्द गरेको थियो । त्यसको करिब साढे नौ महिनापछि गत ६ भदौमा सरकारले शर्तसहित टिकटकमाथिको प्रतिबन्ध हटाएको थियो ।
टिकटक नेपालमा दर्ता हुनुपर्ने, ‘प्वाइन्ट अफ कन्ट्याक्ट’अर्थात् सम्पर्क केन्द्र तोक्नुपर्ने, नेपालको पर्यटन प्रवर्द्धन, डिजिटल सुरक्षा, डिजिटल साक्षरता, सार्वजनिक शिक्षाका क्षेत्रमा सहयोग गर्नुपर्ने शर्त सरकारले राखेको थियो ।
त्यस्तै, सामाजिक दुर्भावना फैलाउने खालका ‘कन्टेन्ट’ भित्र रहेका शब्द, वाक्यहरूको अंग्रेजी, नेपालीसहित नेपालभित्र बोलिने अन्य भाषामा ‘फिल्टरेसन’ र ‘मोडरेसन’ गर्नुपर्ने शर्तपनि टिकटकले स्वीकारेको छ ।
करिब १० महिनाको टिकटक प्रतिबन्धबाट सरकारले ३ अर्ब रुपैयाँ आय गुमाएको सञ्चारमन्त्री पृथ्वी सुब्बा गुरुङले बताएका थिए । प्रतिबन्ध लगाएकै बेलादेखि टिकटकले सरकारलाई प्रतिबन्ध फुकुवा गर्न पटक–पटक निवेदन दिएको थियो ।
चीन सरकारले पनि सरकारमाथि प्रतिबन्ध खोल्न दबाब बढाएको थियो । टिकटकमाथिको प्रतिवेदन खुलेसँगै नेपाल टिकटकको प्राथमिकतामा पर्न थालेको छ।
केही साता अघि मात्रै टिकटले नेपाललाई हेर्ने गरी एक जना नीति व्यवस्थापक (पोलिसी म्यानेजर)को दरखास्त आह्वान गरेको थियो उसले नेपालको बजार र सरकारसँग निकट सम्बन्ध राखेर काम गर्ने प्रयासस्वरूप यो विज्ञापन गरेको हो ।
