२० असोज , काठमाण्डौ।
पहिलो संस्करणको नेपाल प्रिमियर लिग (एनपीएल) को अक्सन आज हुँदैछ । आयोजक नेपाल क्रिकेट संघ (क्यान)का अनुसार अक्सन दिउँसो दुई बजेदेखि सुरु हुनेछ । अक्सनमा डेढ सयभन्दा बढी खेलाडी सहभागी हुनेछन् ।
जसमा एक टिमले ९० लाखसम्म खर्च गर्नेछन् भने एक खेलाडीका लागि सर्वाधिक १५ लाखसम्म खर्च गर्न सक्नेछन् । आयोजक नेपाल क्रिकेट संघ (क्यान)का अनुसार अक्सन दिउँसो दुई बजेदेखि सुरु हुनेछ।
अक्सनमा डेढ सयभन्दा बढी खेलाडी सहभागी हुने क्यानले जनाएको छ। प्रतियोगिता नोभेम्बर ३० देखि डिसेम्बर २१ सम्म कीर्तिपुरस्थित त्रिवि क्रिकेट मैदानमा हुने तय छ। प्रतियोगिताका लागि असोज ५ गते दर्ता प्रकृया खुला गरिएको थियो।
उक्त दर्ता प्रकृया असोज १२ गते बन्द भएको थियो। अक्सनका लागि ४२३ खेलाडी दर्ता भएका थिए। त्यसमध्ये नेपाल प्रिमियर लिग समितिले १४२ खेलाडीलाई अक्सनमा सहभागी गराउने निर्णय गरिएको थियो।
तर, केही खेलाडी छुटफुट पनि भएको भन्दै क्यानले अक्सनमा खेलाडी बढाएर राख्ने निर्णय गरेको छ। यसअघि नै सार्वजनिक भइसकेको सूचीअनुसार ग्रेड ‘ए’ मा २७, ‘बी’ मा ३८ र ‘सी’ मा ७७ खेलाडी छन्। एनपीएलको तयारीमा जुटेको क्यानले टिमसहित मार्की खेलाडी टुंगो लगाइसकेको छ।
चितवन राइनोजमा कुशल मल्ल, लुम्बिनी लायन्समा रोहित पौडेल, काठमाडौं गुर्खाजमा करण केसी, पोखरा एभेन्जर्समा कुशल भुर्तेल, विराटनगर किंग्समा सन्दीप लामिछाने, जनकपुर रोयल्समा आसिफ शेख, कर्णाली याक्समा सोमपाल कामी र सुदूरपश्चिम रोयल्समा दीपेन्द्रसिंह ऐरी मार्की खेलाडी छन्।
तर, राष्ट्रिय टोलीमा रहेका उनीहरू क्यानडा भ्रमणमा छन्। विश्वकप लिग २ मा क्यानडा भ्रमणमा रहेका नेपाली खेलाडी त्याहाबाट अमेरिका प्रस्थान गर्नेछन् । उनीहरु कात्तिक १९ गतेअर्थात नोभेम्बर ४ पछि मात्रै नेपाल फर्किनेछन् ।
लिग–२ म नेपालले अमेरिकासँग २७ अक्टोबर र २ नोभेम्बर तथा स्कटल्यान्डसँग २९ अक्टोबर र ४ नोभेम्बरमा खेल्नेछ । क्यानका अनुसार एनपीएलको एक टोलीमा १६ खेलाडी हुनेछन्। अक्सनमा भने १० खेलाडी मात्रै किन्न पाइनेछ।
चार विदेशी खेलाडी आन्तरिक सहमतिमा भित्र्याउन पाइने छ। एक ट्यालेन्ट हन्टबाट खेलाडी राख्नुपर्छ। अक्सनमा एक टोलीले कुल ९० लाख खर्च गर्नुपर्ने हुन्छ। ग्रेड ‘ए’ न्यूनतम १० र उच्चतम १५ लाख राखिएको छ।
ग्रेड ‘बी’मा न्यूनतम ५ लाख र उच्चतम १० लाख छ। ग्रेड ‘सी’मा न्यूनतम २ र उच्चतम ५ लाख रुपैयाँ तोकिएको छ। उच्चतम मूल्यमा गए लक्की ड्रबाट निर्धारण हुनेछ। एक टोलीले ‘ए’ र ‘सी’ ग्रेडका समान तीन खेलाडी किन्न पाउने छन्।
यस्तै, ‘बी’ ग्रेड का चार खेलाडी किन्नुपर्नेछ। कुनै खेलाडी पहिलो चरणमा अनसोल्ड भएमा अन्तिममा फेरि मौका पाउनेछन्। तर, ग्रेडमा घटुवा हुने क्यानले जनाएको छ।
