२१ असोज , काठमाण्डौ।
झापामा दुई साताअघि मेडिकल व्यवसायी दुर्गा प्रसाईँका समर्थकहरुले उनी पक्राउको विरोधका क्रममा ट्रकमा आगो लगाउँदा घाइते भएका एकजना ट्रक चालकको मृत्यु भएको छ । आगजनीमा परेका ट्रक र चालक दुवै भारतीय रहेका छन् ।
डब्लुबी ७३ ई ३०५६ नम्बरको भारतीय ट्रकका चालक छप्रा उत्तर दिनाजपुर घर भएका ४० वर्षीय पदा रायको उपचारको क्रममा मृत्यु भएको प्रहरीले जनाएको छ । प्रसाईँ पक्राउको विरोधमा झापा बन्द गर्ने भन्दै आन्दोलनमा उत्रिएका उनका समर्थकले यही असोज ७ गते बिर्तामोड–६ गिरीबन्धु टी–स्टेटनजिकै पूर्वपश्चिम राजमार्गमा ट्रकमा आगजनी गर्दा उनी गम्भीर घाइते भएका थिए ।
उनलाई सुरुमा बिर्तामोडकै बीएण्डसी अस्पतालमा उपचार गरेर पछि थप उपचारका लागि नर्थ बंगाल मेडिकल कलेज लगिएको थियो । त्यहीँ उनको मृत्यु भएको प्रहरीले जनाएको छ ।
मृतक रायका आफन्तले आइतबार साँझ एसियन हाइवेको काँकडभिट्टा नाका नजिक भारतको पानीटंकीतर्फ शव राखेर प्रदर्शन गरेका थिए । उनीहरूले आधाघण्टासम्म नाकामा अवरोध गरेको झापा प्रहरीले जनाएको छ ।
पछि नेपाल र भारतीय प्रहरीको समन्वयमा रायको शव पोस्टमार्टमको लागि प्रादेशिक अस्पताल भद्रपुर लगिएको जिल्ला प्रहरी कार्यालय झापाले जनाएको छ । आगजनी गर्ने दुर्गा प्रसाईँका ८ जना समर्थकलाई प्रहरीले त्यतिबेलै पक्राउ गरेको थियो ।
उनीहरूमाथि आपराधिक उपद्रो तथा ज्यान मार्ने उद्योगको मुद्दा दर्ता गरिएको प्रहरीले जनाएको छ ।
पक्राउ पर्नेहरूमा राष्ट्र राष्ट्रियता धर्म संस्कृति नागरिक बचाउ महाअभियान झापाका सदस्य हल्दिवारी– १ बस्ने २४ वर्षीय विवश लिम्बू, अभियान झापाका जिल्ला सदस्य बुद्धशान्ति– ४ बस्ने १९ वर्षीय बलिहाङ माबो लिम्बू , अभियानका मेचीनगर नगर इन्चार्ज मेचीनगर– ६ बस्ने ३४ वर्षीय राजेश महत , अभियानका जिल्ला कोषाध्यक्ष अर्जुनधारा–९ बस्ने ३८ वर्षीय रुद्र भुजेल, अभियानका सल्लाहकार सदस्य हल्दिबारी– १ बस्ने ५१ वर्षीय वरिबहादुर गुरुङ र अभियानका सदस्य बिर्तामोड– ३ बस्ने ३५ वर्षीय उदय लिम्बू रहेका छन् ।
यसअघि प्रहरीले अभियानको भ्रातृ संस्था पीडीएफका झापा संयोजक ४० वर्षीय भीम तुम्बापो लिम्बू र अभियानका झापा सहसचिव ३३ वर्षीय सुरेश चौधरीलाई पक्राउ गरेको थियो ।
उनीहरूमाथि पनि आपराधिक उपद्रो र ज्यान मार्ने उद्योगको मुद्दा दर्ता भएको छ । प्रसाईंका समर्थकहरूले असोज ६ गते राति दुई वटा भारतीय ट्रकमा आगजनी गर्नुका साथै ट्रक चालकको समेत ज्यान लिने प्रयास गरेका थिए ।
जसको उपचारका क्रममा निधन भएको छ । साइबर अपराध कसुरमा पक्राउ परेका प्रसाईंभने एक लाख धरौटी बुझाएर रिहा भइसकेका छन् ।
