२८ असोज,एजेन्सी ।
विश्व क्रिकेटमा एकपछि अर्काे कीर्तिमान बनाएर भारतीय क्रिकेटका समर्थकमाझ भगवानरुपी मानवको छवि बनाएका विश्व क्रिकेटका लिजेन्ड सचिन तेन्दुलकर क्रिकेटसँगसँगै जोडिएर आउने नाम हो ।
उनले विश्व क्रिकेटमा यस्ता थुप्रै कीर्तिमानहरु बनाएका छन् जसलाई तोड्न निकै समय खर्चिनु पर्नेछ । अहिलेपनि यस्ता थुप्रै क्रिकेटरहरु छन् जसले तेन्दुलकरले बनाएका कीर्तिमानहरु पछ्याइरहेका छन् ।
सन् २०१२ मा ‘वान डे’बाट र सन् २०१३ मा टेस्टबाट संन्यास लिएका सचिनको एक कीर्तिमान भने पछिल्लो समय तोडिएको छ । सचिनको एक कीर्तिमान भने हालै तोडिएको छ । यो कीर्तिमान हो, वान डेको सर्वाधिक ४९ शतक ।
सचिनले सन् २०१२ मार्चमा बंगलादेशविरुद्ध ४९ औं शतक प्रहार गरेका थिए । त्यसको ११ वर्षपछि विराटले ५० औं शतक प्रहार गरेर सचिनको यो कीर्तिमान तोडेका हुन् । अहिले विराट वान डेमा ५० शतक प्रहार गर्ने पहिलो खेलाडी बन्नुका साथै वान डेमा सर्वाधिक शतक प्रहार गर्ने खेलाडी बनेका छन् ।
तर, वान डेमा वेस्ट इन्डिजका डेसमेन्ड हायन्सले बनाएको १७ शतक सर्वाधिक संख्या भएकाबेला सचिनले सन् १९९८ मा यो कीर्तिमान तोडेका थिए । विराटले नतोडुन्जेल सचिनको वान डेमा सर्वाधिक शतक प्रहारको कीर्तिमान झण्डै २५ वर्षसम्म सुरक्षित रहेको थियो ।
सचिनले बनाएका मुख्य कीर्तिमानमा पहिलो छ :
सबैभन्दा बढी रन बनाएको
—टेस्ट क्रिकेटमा उनले १५ हजार ९ सय २१ रन बनाएका छन् । सन् २०१३ मा संन्यास लिएका सचिनले यो कीर्तिमान राखेको ११ वर्ष बितिसकेको छ र अझै पनि यो कीर्तिमान तोडिने सम्भावना देखिएको छैन । उनीपछाडि रहेका रिकी पोन्टिङ (१३ हजार ३ सय ७८ रन), ज्याक कालिस (१३ हजार २ सय ८९ रन), राहुल द्रविड (१३ हजार २ सय ८८ रन) र एलेस्टर कुक (१२ हजार ४ सय ७२ रन) ले संन्यास लिइसकेका छन् ।
— हाल क्रिकेटमा सक्रिय इंग्ल्यान्डका जोए रुट १२ हजार ४ सय २ रन बनाएर छैठौं स्थानमा छन् । उनले सचिनको कीर्तिमान तोड्नका लागि थप ३५ सय २० रन बनाउनुपर्नेछ । उनी हाल ३४ वर्षका भएकाले सचिनको कीर्तिमान तोड्न अझै केही वर्ष खेल्नका लागि फिट रहनु जरुरी छ ।
— इंग्ल्यान्डका जोए रुटपछाडि रहेका १२ खेलाडी पनि संन्यास लिइसकेका छन् । रुटपछाडि रहेका १३औं खेलाडी विराट कोहली हाल खेलिरहेका छन् । उनले आठ हजार आठ सय ७१ रन बनाएका छन् । हाल उनको उमेर करिब ३५ वर्ष पुगिसकेको हुँदा उनले सचिनको कीर्तिमान तोड्नसक्ने संभावना देखिएको छैन ।
यस्तै सबैभन्दा बढी खेलेको कीर्तिमान
—सचिनले सबैभन्दा बढी अर्थात् २०० टेस्ट खेलेका छन् । सचिनपछाडि रहेका जेम्स एन्डरसन (१८८ टेस्ट) ले पनि हालै संन्यास लिइसकेका छन् । सर्वाधिक टेस्ट खेलेको सूचीमा उनीपछि रहेका १० जना खेलाडीले संन्यास लिइसके । यसैले यो कीर्तिमान पनि ११ वर्षदेखि सुरक्षित छ । ११ औं खेलाडीमा इंग्ल्यान्डका जोए रुट छन् । १४६ टेस्ट खेलेका उनी सचिनभन्दा ५४ टेस्टले पछाडि छन् । यस्तै, हाल सक्रिय रहेका विराट कोहलीले ११४ टेस्ट खेलेका छन् । सचिनको रेकर्ड तोड्न उनलाई ८७ टेस्ट खेल्नुपर्ने हुन्छ । उनलाई पनि उमेरकै कारण सचिनलाई उछिन्न गाह्रो पर्ने पक्का छ ।
सर्वाधिक सेन्चुरी (शतक)को कीर्तिमान
—उनले टेस्टमा ५१ सेन्चुरी प्रहार गरेर राखेको कीर्तिमानलाई उनीपछि सर्वाधिक सेन्चुरी प्रहार गर्ने दक्षिण अफ्रिकाका ज्याक कालिसले तोड्न सम्भावना देखिएको थियो । तर, उनले पनि ४५ सेन्चुरी बनाएर संन्यास लिइसके । कालिसपछिका धेरैजसो खेलाडीले पनि संन्यास लिइसकेका छन् । हाल सक्रिय रहेका खेलाडीमा रुटले ३४ र विराटले २९ शतक प्रहार गरेका छन् । लगातार शतक प्रहार गर्नसके मात्रै यी दुईमध्ये एकले सचिनको कीर्तिमान तोड्न सक्छन् ।तर, त्यो सम्भावना पनि कमै देखिन्छ ।
‘वान डे’मा सर्वाधिक रनको कीर्तिमान
टेस्टमा जस्तै वान डेमा पनि सचिन अगाडि छन् । सन् २०१२ मा संन्यास लिएका उनले वान डेमा १८ हजार चार सय २६ रन बनाएका छन् । दोस्रो स्थानमा रहेका श्रीलंकाका कुमार सांगकाराले १४ हजार दुई सय ३४ रन बनाएर संन्यास लिइसकेका छन् ।
तेस्रो स्थानमा रहेका विराटले १३ हजार ९ सय ६ रन बनाएर सचिनको रेकर्ड तोड्ने संभावना देखाएका छन् । तर, सचिन अझै उनीभन्दा चार हजार पाँच सय २० रनले अगाडि छन् । उनले अन्तर्राष्ट्रिय क्रिकेटबाट सन्यास लिएको ११ वर्ष भइसक्यो तर आज पनि उनको ब्याटिङ हेर्नको लागि क्रिकेटप्रेमीहरु त्यति नै उत्सुक छन् ।
उनले आफ्ना फ्यानहरुको चाहना पूरा गर्न पनि कुनै कसर बाँकी राख्दैनन् । अब इन्डियन प्रिमियर लिग जस्तै क्रिकेट विश्वमा अर्को नयाँ प्रतियोगिता सुरु हुन लागेको छ । जसमा भारतका दिग्गज क्रिकेटर सचिन तेन्दुलकर र सुनिल गावस्करसहितका क्रिकेटरले ६ टोलीको अन्तर्राष्ट्रिय मास्टर्स लिग (आईएमएल) सुरु गर्ने घोषणा गरेका छन् ।
यस वर्ष यसको पहिलो सिजन खेलिनेछ, जसमा भारत, अष्ट्रेलिया, दक्षिण अफ्रिका, वेस्ट इन्डिज, इंग्ल्याण्ड र श्रीलंकाका क्रिकेट स्टारहरू सहभागी हुनेछन्। सुनिल गावस्करलाई लिग आयुक्त नियुक्त गरिएको छ।
यस लिगको बारेमा सचिन तेन्दुलकरले भनेका छन्– क्रिकेटको लोकप्रियता भारतमा मात्रै होइन विश्वभर बढिरहेको छ । पछिल्लो दशकमा टी–२० क्रिकेटले फ्यानहरु माझ द्रुत रुपमा आफ्नो स्थान बनाएको छ र यस खेलका नयाँ फ्यानहरु निर्माण भएका छन् ।
अब सबै उमेरका फ्यानहरू पुरानो लडाइहरू नयाँ ढाँचाहरूमा पुनः लागू भएको हेर्न चाहन्छन्। उनले थप भनेका छन् , ‘खेलाडी कहिल्यै पनि हृदयबाट सन्यास लिदैनन् र उनीहरुभित्र एउटा आत्मा हुन्छ जो मैदानमा फर्कने अवसरको पर्खाइमा हुन्छ ।
हामीले भावुक फ्यानहरू र प्रतिस्पर्धी क्रिकेटरहरूलाई क्रिकेटको आनन्द लिनको लागि नयाँ प्लेटफर्म पाएका छौं। म विश्वस्त छु कि सहभागी सबै खेलाडी लयमा फर्किनेछन् र कडा मेहनत गर्नेछन्।
