२ कार्तिक ,एजेन्सी ।
पोर्चुगिज कप्तान क्रिस्टियानो रोनाल्डो सन् २००९ देखि २०१८ सम्म स्पेनिस क्लब रियल मड्रिडका लागि व्यवसायिक फुटबल खेले । त्यो नौ वर्षको अवधिमा उनले पाँच वर्षको अवधिमा चार पटक च्याम्पियन्स लिगमात्र जितेनन्, व्यक्तिगत अवार्डतर्फ चारवटा बालोन डी‘ओर पनि उचाले ।
स्पेन आउनुअघि नै इंग्ल्यान्डको म्यानचेस्टर युनाइटेडबाट उनले एउटा च्याम्पियन्स लिग र एउटा बालोन डी‘ओर जितिसकेका थिए । युनाइटेडबाट सर्वाधिक महँगो बन्दै रियलमा अनुबन्धित भएपछि उनी आफ्ना प्रतिद्वन्द्वी लियोनल मेसीलाई उछिन्दै तीन पटक गोल्डेन बुट जित्न सफल भए ।
रियलमै छँदा रोनाल्डोले युरोपमा उत्कृष्ट खेलाडीका रूपमा चार वटा अवार्ड पनि चुमे । रियलबाट सबैखाले प्रतियोगिता गरी ४३८ खेल खेल्दा रोनाल्डोले ४५० गोल र १३१ गोलमा आफ्नो योगदान दिए ।
रियलमा छँदा रोनाल्डो विश्वफुटबलमा हरेको दिनजस्तो समाचारको हेडलाइन बन्नेगरेका थिए । रियलबाट कुल १६ वटा उपाधि जितेका रोनाल्डोले स्पेनमा देखाएको जस्तो उत्कृष्टता अरू क्लबमा देखाउन सकेनन् ।
अनि, स्पेनमा जत्तिको अरू देशमा अडिन पनि सकेनन् । पारिश्रमिक विवादलगायत थुप्रै समस्याका कारण १० जुलाई २०१८ मा रियल छोडेर इटालियन क्लब युभेन्टस पुगेका थिए, रोनाल्डो । ३३ वर्षको उमेरमा पनि खारिलो प्रदर्शन गर्न सक्ने भएका कारण युभेन्टसले रोनाल्डोलाई ११७ मिलियन युरो खर्चिएर क्लबमा भित्र्याएको थियो ।
तर, तीन वर्ष इटालीमा बसेर पुनः युनाइटेडमा फर्किए, रोनाल्डो । युनाइटेडमा पनि प्रशिक्षकसँग टकराव हुने भएपछि उनी साउदी अरेबियन क्लब अल नासर पुगे । सन् २०२३ यता साउदी प्रो–लिग खेलिरहेका रोनाल्डो स्पेन फर्किँदै छन् ।
तर, कुनै क्लबमा अनुबन्धित हुन होइन, मैत्रीपूर्ण खेल खेल्न । रोनाल्डोआबद्ध अल नासर र स्पेनिस महारथी रियलबीच चालू सिजनको अन्त्यमा मैत्रीपूर्ण फुटबल हुन लागेको अन्तर्राष्ट्रिय रिपोर्टहरूमा उल्लेख छ ।
आगामी रियाद सिजनमा मैत्रीपूर्ण खेल खेल्नका लागि क्रिस्टियानो रोनाल्डोको अल–नासरसँग छलफल हुने सम्भावना रहेको छ। साउदी प्रो लिग टोलीविरुद्ध खेल्नका लागि रियल म्याड्रिड एक प्रस्तावित क्लब हो। २०२४ को रियाद सिजन अक्टोबर १२ देखि सुरु भई २०२५ सम्म चल्नेछ ।
पत्रकार अब्दुलअजिज अल–ओसैमीका अनुसार, साउदी अरबको जनरल इन्टरटेनमेन्ट अथोरिटीका अध्यक्ष तुर्की अल–शेखले आगामी रियाद सिजनमा सम्भावित मैत्रीपूर्ण खेलबारे अल–नासरसँग छलफल गर्नेछन्।
उनले रियल मड्रिडलाई विपक्षी क्लबको रूपमा प्रस्ताव गरेको रिपोर्टमा जनाइएको छ । यसै वर्षको सुरुमा, स्पेनिस मिडिया मार्काले रोनाल्डोआबद्ध अल–नारस र रियल मड्रिडबीचको सम्भावित खेल नयाँ स्यान्टियागो बर्नाबेउ स्टेडियममा हुने जनाएको छ ।
उक्त स्टेडियमको उद्घाटन चालु सिजनको अन्त्य र २०२५ बीचमा हुने अपेक्षा गरिएको छ। रियलका अध्यक्ष फ्लोरेन्टिनो पेरेज नासरसँगको खेल गराउन उत्सुक थिए। तथापि, रियल र नासरबीचको मैत्रीपूर्ण खेलबारे दुवै टोलीबाट आधिकारिक रूपमा जानकारी आएको छैन ।
तर, अब उक्त खेल भएमा रोनाल्डो पूर्वक्लब रियलविरुद्ध मैदान उत्रिने छन् भने रोनाल्डोका फ्यानसमेत रहेका किलियन एम्बाप्पेले उनीविरुद्ध खेल्नु पर्ने छ । रोनाल्डो पुगेपछि नै अल नासरले गत वर्ष फ्रान्सेली क्लब पेरिस सेन्ट जर्मेन (पिएसजी) सँग मैत्रीपूर्ण खेल खेलेको थियो ।
जसमा ब्राजिलियन स्ट्राइकर नेयमार र फ्रेन्च स्टार एम्बाप्पे रोनाल्डोको क्लबविरुद्ध मैदान उत्रिँदा मेसी भने टोलीमा थिएनन् । अल नासर र रियल मड्रिडबीच एकमात्र खेल भएको छ, जसमा साउदी क्लबले जित निकालेको छ ।
सन् २००८ मा भएको मैत्रीपूर्ण खेलमा घरेलु टोली नासरले रियललाई ४–१ गोलले हराएको थियो । ७० हजार दर्शकबीच खेलाइएको खेलमा रियलका रामोस, मार्सेलो, क्यासिलास जस्ता चर्चित खेलाडी सामेल थिए । तथापि, अहिले भने रियलको टोली बलियो अवस्थामा रहेका कारण नासरमाथि हाबी हुन सक्ने आँकलन गरिएको छ ।
