५ कार्तिक , काठमाण्डौ।
नेपालले अमेरिकाविरुद्धको पहिलो ३ खेलको टि ट्वान्टी सिरिजमा ऐतिहासिक क्लिन स्विप गरेको छ । तेस्रो टि ट्वान्टी खेलमा आज विहान ८ विकेटको जित हात पार्दै नेपालले सिरिज क्लिन स्विप गरेको हो । आसिफ र दुई कुशल चम्किँदा नेपालले घरेलु टोलीविरुद्धको तीन टी–२० आई सिरिज क्लिन स्वीप गरेको हो ।
नेपालले टि ट्वान्टी आईमा दोस्रो पटक सिरिज क्लिन स्विप गरेको हो । यसअघि सन् २०१९ मा नेपालले मलेसियामा घरेलु टोलीविरुद्धको २ खेलको टि ट्वान्टी आई सिरिज क्लिन स्विप गरेको थियो । १ सय ५७ रनको मध्यम लक्ष्य नेपालले १८.४ ओभरमा २ विकेट गुमाएर पूरा गर्यो ।
नेपालको जितमा आसिफ शेखले ३९ बलमा ५ चौका र २ छक्काको सहयोगमा ५० रनको अर्धशतकीय इनिङ खेले । टि ट्वान्टी करियरको छैठौं अर्धशतक बनाए लगत्तैको बलमा आसिफ जायस ड्रेल्सद्वारा आउट भए । नेपाली ओपनर आसिफ शेख प्लेयर अफ द म्याच भए ।
आसिफले आफ्नो टि ट्वान्टी करियरमा तेस्रो पटक प्लेयर अफ द म्याच अवार्ड जितेका हुन् । यसअघि आसिफले सन् २०२२ मा मलेसियाविरुद्ध पहिलो तथा सन् २०२३ मा युएईविरुद्ध दोस्रो प्लेयर अफ द म्याच जितेका थिए ।
यस्तै कुशल मल्लले ३० बलमा ४ चौका र १ छक्काको सहयोगमा नट आउट ४४ रन बनाए । यस सिरिजमा पहिलो पटक मौका पाएका कुशल मल्लले कुशल भुर्तेलसँग मिलेर तेस्रो विकेटका लागि नट आउट ७४ रनको साझेदारी गरे ।
भुर्तेलले ३२ बलमा २ चौका र १ छक्काको सहयोगमा नट आउट ४० रन जोडे । ओपनर अनिलकुमार शाह पहिलो विकेटका रुपमा १३ रन बनाउँदै जसदिप सिंहको बलमा एलबिडब्लु आउट भए । अमेरिका लागि जायस ड्रेल्स र जसदिप सिंहले समान १ विकेट लिए ।
त्यसअघि अमेरिकाको ग्राण्ड प्रेरीमा टस जितेर पहिले ब्याटिङ गरेको घरेलु टोलीले निर्धारित २० ओभरमा ५ विकेट गुमाएर १ सय ५६ रनको योगफल तयार गरेको थियो । साइतेजा मुक्कामल्लाले ५० बलमा ५ चौका र २ छक्काको सहयोगमा ६८ रन बनाए ।
मुक्कामल्ला अर्धशतक बनाएर सोमपाल कामीको बलमा बोल्ड आउट भए । चौथो विकेटका लागि मुक्कामल्ला र मिलान्ड कुमारले ७६ रनको साझेदारी गरेका थिए । कुमारले ३५ बलमा ४ चौकाको सहयोगमा नट आउट ४३ रन बनाए ।
आरोन जोन्स १३ रन बनाउँदै ललित राजवंशीको बलमा रिजन ढकालबाट समातिए । अमेरिका कप्तान मोनांक पटेल २ रन बनाउँदै सोमपालको बलमा एलबिडब्लु धरापमा परे । हर्मित सिंह १० रनमा नट आउट रहे ।
नेपालका लागि सोमपालले ३ तथा रिजन ढकाल र ललितले समान १ विकेट लिए । नेपालका तीव्र गतिका बलर सोमपाल कामी प्लेयर अफ द सिरिज बने । सोमपालले सिरिजका ३ खेलमा ५ विकेट लिएका थिए ।
पहिलो खेलमा कुनै विकेट लिन नसकेका सोमपालले दोस्रो खेलमा २ तथा तेस्रो खेलमा ३ विकेट लिएका हुन् । दोस्रो खेलमा भएको सुपर ओभरमा सोमपालले २ रन खर्चिएर २ विकेट लिएका थिए ।
नेपालले अमेरिकासँगको सिरिज भने एक खेल अगावै आइतवार नै जितिसकेको थियो । पहिलो टि ट्वान्टी आईमा १७ रनले जित हात पारेको नेपालले दोस्रो खेल सुपर ओभरमा जितेको थियो । यस सिरिज पछि नेपाली टोलीले अमेरिका ए सँग ५० ओभरको अभ्यास खेल खेल्नेछ ।
त्यसपछि कात्तिक ९ गतेबाट विश्व कप लिग टु अन्तर्गतको त्रिकोणात्मक सिरिज सुरु हुनेछ । त्रिकोणात्मक सिरिजमा घरेलु टोली अमेरिका, नेपाल र स्कटल्याण्डको सहभागिता रहनेछ । क्यानडाको सिरिजमा निराशाजनक प्रर्दशन गरेको नेपाललाईलाई अमेरिकी सिरिजमा जित अत्यावश्यक छ ।
