८ कार्तिक , काठमाण्डौ ।
जिम्बाब्वेले टी–२० अन्तर्राष्ट्रिय क्रिकेटमा नेपालले बनाएका इतिहासकै केही दुर्लभ कीर्तिमानहरू आफ्नो नाममा सारेको छ । गाम्बियाविरुद्ध भएको खेलमा जिम्बाव्वेले नेपालका महत्त्वपूर्ण तीन कीर्तिमान भंग गरेको हो ।
उसले आइसिसी टी–२० क्रिकेटमा धेरै रन बनाउने नेपालको कीर्तिमान तोडेको छ । जिम्बावेले आइसिसी पुरुष टी–२० सब रिजनल छनोटमा गाम्बियाविरुद्ध चार विकेट गुमाउँदै ३४४ रन बनाएको हो ।
यसअघि सन् २०२३ मा नेपालले मंगोलियाविरुद्ध ३१४ रन बनाउँदै सबैभन्दा धेरै रन बनाउने कीर्तिमान बनाएको थियो । चीनको हान्झाउमा भएको १९औं एसियाडमा नेपालले क्रिकेटमा कीर्तिमानी जित निकालेको थियो ।
जेजियाङ युनिभर्सिटी अफ टेक्नोलोजी फिनफेङ क्रिकेट फिल्डमा भएको खेलमा नेपालले मंगोलियालाई २७३ रनको फराकिलो अन्तरले पराजित गरेको थियो । त्यसबेला नेपालले मंगोलियाविरुद्ध टस हारेर तीन विकेट गुमाउँदै ३१४ रन बनाएको थियो ।
प्रत्युत्तरमा १३.१ ओभरमा अल आउट हुँदा मंगोलियाले ४१ रन मात्रै बनायो । नेपाल २७३ रनले विजयी भएको थियो । नेपालको जितमा कुशल मल्लले अविजित १३७ रन बनाएका थिए । उनले ५० बलमा १२ छक्का र ८ चौका प्रहार गरेका थिए ।
कप्तान रोहितकुमार पौडेलले २७ बलमा ६१ तथा दीपेन्द्रसिंह ऐरीले १० बलमा ५२ रन बनाएका थिए । यही खेलमा दीपेन्द्रसिंहले ६ बलमा ६ छक्का प्रहार गरेका थिए ।यस खेलमा नेपालले टिमतर्फ सर्वाधिक स्कोर र फराकिलो जित अनि व्यक्तिगततर्फ सबैभन्दा छिटो शतक र सबैभन्दा छिटो अर्धशतकलगायतको कीर्तिमान पनि बनाएको थियो ।
नेपालले पनि त्यसअघि चेक रिपब्लिकले बनाएको कीर्तिमान भंग गरेको थियो । कन्टिनेन्टल कपअन्तर्गत ३० अगस्ट २०१९ मा भएको खेलमा चेक रिपब्लिकले टर्कीलाई २५७ रनले पराजित गर्दै इतिहास रचेको थियो ।
तर, चार वर्षपछि नेपालले चेक रिपब्लिकको कीर्तिमान आफ्नो नाममा सारेको थियो । नेपालको रेकर्ड तोड्ने क्रममा बुधबार टस जितेर ब्याटिङ गरेको जिम्बावेका लागि सिकन्दर राजाले १३३ रन बनाए ।
चौथो नम्बरमा क्रिजमा आएका उनले ४३ बलमा १५ छक्का र ७ चौका प्रहार गरे । त्यस्तै, ओपनर तादिवानासे मारुमानीले ६२, ओपनर ब्राइन बेनेटले ५० तथा क्लिभ मेन्डेनले ५३ रन बनाएका छन् ।
तादिवानासे र ब्राइनले पहिलो विकेटका लागि ९८ रनको साझेदारी गरेका थिए । प्रत्युत्तरमा गाम्बियाले १४।४ ओभरमा अल आउट हुँदा मात्र ५४ रन बनाउन सक्यो । गाम्बियाका कुनै पनि खेलाडीले दोहोरो अंकमा रन बनाउन सकेनन् ।
जिम्बावेका रिचार्ड गाराभा र ब्रान्डन माभुताले समान तीन विकेट हात पारेका थिए । यस्तै, जिम्बाब्वेले टस जितेर पहिले ब्याटिङ गर्दै ३ सय ४४ रन बनाउँदा सर्वाधिक छक्काको रेकर्ड पनि कायम गर्यो।
उसले यो रेकर्डपनि नेपालले नै बनाएको कीर्तिमान तोडेको हो। जिम्बाब्वेले यो इनिङमा २७ छक्का प्रहार गरेको थियो । यसअघि नेपालले २६ छक्काका साथ सर्वाधिक छक्काको कीर्तिमान बनाएको थियो ।
सिकन्दरले सर्वाधिक १५ छक्का प्रहार गरेका थिए। जिम्बाबेले यो खेल २९० रनले जितेको छ । ३४५ रनको लक्ष्य पछाएको गाम्बिया भने १४.४ ओभरमा केवल ५४ रन बनाएर अल आउट भएको थियो ।
जिम्बाब्वेले गाम्बियाविरुद्ध १२ दशमलव ५ ओभरमा २०० रन पुरा गरेको थियो । यो टी–२० अन्तर्राष्ट्रियमा सबैभन्दा छिटो २०० रन बनाउने टोली हो । यसअघि यो कीर्तिमान दक्षिण अफ्रिकाको नाममा थियो जसले १३.५ ओभरमा यो रन जाडेको थियो ।
जिम्बाब्वेले गाम्बियालाई २९० रनले जित्यो, यो टी–२० क्रिकेट इतिहासमा सबैभन्दा ठूलो जित हो ।
