१८ कार्तिक , एजेन्सी ।
श्रीलंका हङकङ सिक्सेस क्रिकेट प्रतियोगिताको च्याम्पियन बनेको छ । आइतबार सम्पन्न रोमाञ्चक फाइलनमा श्रीलंकाले प्रतिद्वन्दी अर्को दक्षिण एसियाली राष्ट्र पाकिस्तानलाई तीन विकेटले हराउँदै उपाधि पोल्टामा पारेको हो ।
टस हारेर पहिलो ब्याटिंगको निम्तो पाएको पाकिस्तानले ५.२ ओभरमा अलआउट हुनुअघि ७२ रनमात्र बनाउन सक्यो । त्यसपछि जवाफी ब्याटिंगमा आएको श्रीलंकाले भने पाँच ओभरमै तीन विकेट गुमाएर ७६ रन बनाउँदै विजयलक्ष्या पार गर्यो ।
श्रीलंकाको जितमा ओपनर सन्दुन विराक्कोदीले ३४ रनको योगदान गरे । उनले १३ बलको समाना गरी चार छक्का र एक चौका हिर्काए । अर्का ओपनर धनन्जय लक्सन भने दुई रनमै पभेलियन फर्किए ।
कप्तान लाहिरु मधुसनकाले १९ रन बनाए । उनले पाँच बलमा तीन छक्का हिर्काए । चौथो नम्बरका ब्याट्सम्यान लाहिरु सामराकुनले पनि अविजित एक रन जोडे । पाँचौ नम्बरका ब्याट्सम्यान थारिन्दु रत्नायकेले पनि टोलीका लागि अविजित १६ रनको योगदान गरे ।
उनले केबल चार बलमा दुई छक्का र एक चौका प्रहार गरे । त्यसअघि पहिले ब्याटिंग गरेको पाकिस्तानका लागि ओपनर मुहम्मद अखलकले ४८ रनको योगदान गरेका थिए । उनले केबल २० बलको सामना गरी तीन छक्का र पाँच चौका प्रहार गरे ।
अर्का ओपनर आसिफ अलि भने शून्य रनमै पभेलियन फर्किएका थिए । त्यसपछि आएका हुसैन तलत पनि एक रनभन्दा अगाडि बढ्न सकेनन् । कप्तान फाहिम असरफले १३ रन बनाए । उनले चार बलमा दुई छक्का पनि हाने ।
आमेर यामिन भने ५ रन बनाउँदै आउट भए । साहद खानले पनि एक रनभन्दा धेरै बनाउन सकेनन् । श्रीलंकाली टोलीका बलर धनन्जय लक्सन र थारिन्दु रत्नायके दुई दुई विकेट लिए । निमेष विमुक्थी र लाहिरु मधुसनकाले पनि एक एक विकेट हात पारे ।
प्रतियोगिताको सेमिफाइनलमा पाकिस्तानले अस्ट्रेलियालाई चार विकेटले र श्रीलंकाले बंगलादेशलाई तीन विकेटले हराएर फाइनलमा स्थान पक्का गरेका थिए । यो प्रतियोगितामा नेपालको पनि सहभागिता रहेको थियो ।
तर नेपाली टोली प्रतियोगिताको क्वार्टरफाइनलमा श्रीलंकासंगै ४० रनले पराजित भएको थियो । आज विहान भएको प्लेट सेमिफाइनलमा पनि नेपाल युएईसंग ५ विकेटले पराजित भयो ।
