२० कार्तिक , काठमाण्डौ ।
सहकारीको रकम अपचलनको मुद्दामा पक्राउ परी प्रहरी हिरासतमा रहेका पुर्वगृहमन्त्री एवम् राष्ट्रिय स्वतन्त्र पार्टी (रास्वपा) का सभापति रवि लामिछानेमाथि अनुसनधान गर्न तेस्रोपटक म्याद थप भएको छ ।
जिल्ला अदालत कास्कीका न्यायाधीश चन्द्रकान्त पौडेलको इजलासले रविमाथि थप १० दिन थुनामा राखेर अनुसन्धान गर्न आदेश दिएको हो । जिल्ला सरकारी वकिल कार्यालयले २५ दिन म्याद थप गर्न अनुमति मागेको थियो ।
कात्तिक २ गते काठमाडौंबाट पक्राउ परेका पहिलोपटक कात्तिक ४ गते ६ दिनको म्याद थप गरेको थियो । पुनः दोस्रोपटक ७ दिन म्याद थप गरेको थियो । म्याद कात्तिक १४ गते सकिएपनि तिहार बिदा भएकाले आज म्याद थपका लागि अदालत उपस्थित गराइएको हो ।
यो थपिएको १० दिन भने १५ गतेदेखि नै गणना हुनेछ । कार्तिक १५ गतेदेखि गणना हुनेगरी अदालतले प्रहरीलाई अनुसन्धान गर्न थप समय दिएको कास्की जिल्ला अदालतका सूचना अधिकारी सुरज अधिकारीले जानकारी दिएका छन् ।
रविविरुद्ध कास्की प्रहरीले सहकारी ठगी, संगठित अपराध र सम्पत्ति सुदृढीकरण मुद्दामा अनुसन्धान गरिरहेको छ । प्रहरीले सम्पत्ति शुद्धीकरणमा ९० दिनसम्म हिरासतमा राखेर अनुसन्धान गर्न सक्ने छ ।
यसैगरी, रूपन्देहीमा पनि लामिछानेविरुद्ध पूरक जोहेरी आएको र पक्राउ पुर्जी पनि जारी भइसकेकाले अब बयानका लागि उनलाई त्यहाँ पनि लगिने छ । जिल्ला प्रहरी कार्यालय रूपन्देहीले उनलाई उपस्थित गराइदिन पत्राचार गरिसकेकाले कास्कीमा अदालती प्रक्रिया सकिएपछि त्यता लगिने छ ।
रुपन्देहीका एसपी रञ्जित सिंह राठौरले रविलाई रुपन्देही ल्याउने पुष्टि गरेका छन् । बुटवल स्थित सुप्रिम बचत तथा ऋण सहकारीबाट रास्वपाका सभापति लामिछानेको नाममा ऋण प्रवाह भएको भेटिएको छ ।
उक्त रकम अपलचनमा रविलाई सङ्गठित ठगीको आरोप लागेको छ। उनलाई प्रहरीले विमानबाट ल्याउने र करिब दुई, तीन दिनमा बयान सक्ने योजना बनाएको छ । सोही प्रकरणमा मुछिएका पूर्व डीआईजी छविलाल जोशीलाई पनि कास्कीबाट रुपन्देहीको ल्याएर बयान लिएको थियो ।
छवि पनि कास्की प्रहरी हिरासतमा नै रहेका छन् । उता आफ्ना पार्टी सभापति रवि लामिछाने पक्राउ परेपछि रास्वपाले पोखरामा गरेको विरोध प्रदर्शनमा प्रहरीले अश्रुग्यास प्रहार गरेको छ। प्रर्दशनमा उत्रिएका ७ जनालाई प्रहरीले पक्राउ समेत गरेको छ ।
रास्वपा कार्यकर्ताले प्रदर्शनको क्रममा निषेधित क्षेत्र तोड्न खोजेको भन्दै प्रहरीले अश्रुग्यास प्रहार गरेको हो । तर रास्वपा नेतृ सोविता गौतमले भने प्रहरीकै कारण आज तनाव सृजना भएको बताएकी छन् ।
उनले आफूहरुको शान्तिपूर्ण आन्दोलनमा प्रहरीले हस्तक्षेप गरेको बताएकी छन् । तिहार विदामा शान्त रहेका रास्वपा समर्थक आज रविलाई म्याद थपका लागि अदालत लग्ने दिन पोखरामा प्रर्दशनमा उत्रिएका हुन् ।
अब अदालतको म्याद थपको निर्णयपछि थप रणनीति बनाउने रास्वपाका नेताहरुले बताएका छन् । अबको आन्दोलनका कार्यक्रम भने केन्द्रीय कमिटी बैठकले गर्ने नेताहरुको भनाइ छ । सहकारीको रकम अपचलनमा प्रतिशोधपूर्ण तवरले लामिछानेलाई फसाउन खोजिएको दाबी गर्दै समर्थकहरूले विरोध प्रदर्शन गरिरहेका छन् ।
