२५ कार्तिक ,काठमाण्डौ ।
राष्ट्रपति रामचन्द्र पौडेलले आज दुईजनालाई राजदूत पदमा नियुक्त गरेका छन् । उनले मन्त्रिपरिषद्को सिफारिसमा प्रा. डा. कृष्णप्रसाद ओलीलाई जनवादी गणतन्त्र चीनका निम्ति नेपाली राजदूतमा नियुक्त गरेका छन् ।
यस्तै, लोकदर्शन रेग्मीलाई संयुक्त राज्य अमेरिकाका निम्ति नेपालको आवासीय राजदूतमा नियुक्त गरेका राष्ट्रपतिको कार्यालयले जानकारी गराएको छ । राष्ट्रपतिले नेपालको संविधानको धारा २८२ को उपधारा (१) बमोजिम नेपाल सरकार, मन्त्रिपरिषद्को सिफारिसमा ओली र रेग्मीलाई राजदूत पदमा नियुक्त गरेका हुन् ।
१४ साउनमा मन्त्रिपरिषद्ले १७ देशका लागि नेपाली राजदूत सिफारिस गरेको थियो । संसदीय समितिले अनुमोदन गरेर एग्रिमो आएपछि राष्ट्रपति पौडेलले ओली र रेग्मीलाई राजदूत नियुक्त गरेका हुन् ।
लामो समयदेखि राजदूत रिक्त रहेकोमा प्रधानमन्त्री केपी शर्मा ओली चीन भ्रमणमा जानुअघि चीन र अमेरिकाका लागि पनि राजदूत नियुक्त गरिएको हो । सरकारले यसअघिका राजदूत विष्णुपुकार श्रेष्ठलाई फिर्ता बोलाएपछि चीनमा नेपाली राजदूत पद रिक्त रहँदै आएको थियो ।
अहिले संसदीय सुनुवाइ प्रक्रिया पूरा भइसकेका ओलीलाई राष्ट्रपतिले नियुक्त गरेसँगै अब चीन गएर उनले प्रधानमन्त्रीको भ्रमणको आवश्यक तयारीलाई तीव्रता दिने बताइएको छ । प्रधानमन्त्री ओली यही डिसेम्बर महिनामा चीन भ्रमण जाने तयारीमा छन् ।
भ्रमणको निम्ता आइसकेपनि सरकारी निकायले यकिन मिति भने सार्वजनिक गरेको छैन । भारतबाट चासो नदिएपछि प्रधानमन्त्रीले चीनको भ्रमण गर्न लागेको बताइएको छ । यसैबीच प्रधानमन्त्रीको चीन भ्रमणलाई लिएर सत्ता सहयात्री एमाले र काँग्रेसबीच केही तनाब देखिएको छ ।
ओलीको चीन भ्रमणलाई नै लिएर दुई दलबीच राजनीतिक संयन्त्र बनाइएको र त्यसको चाँजोबाँझो परराष्ट्रमन्त्री आरजु राणाले नै मिलाउने भन्ने संदेश बाहिर आएपछि एमालेले यसमा खण्डन समेत गरेको छ ।
एमालेले गत कात्तिक २१ गते नेपाली कांग्रेससँग बनाइएको दुई दलीय राजनीतिक संयन्त्र प्रधानमन्त्रीको चीन भ्रमणका लागि नबनेको स्पष्टीकरण दिएको छ । शनिबार पार्टी केन्द्रीय कार्यालयमा बसेको सचिवालय बैठकपछि सञ्चारकर्मीसँग कुराकानी गर्ने क्रममा उपमहासचिव प्रदीप ज्ञवालीले यस्तो बताएका हुन् ।
दुई दलबीच सहकार्य भइरहने वातावरण निर्माणका लागि संयन्त्र बनेको उनको दाबी थियो । प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाको नेतृत्वमा ८ सदस्यीय संयन्त्र छ ।
जसमा प्रधानमन्त्री केपी शर्मा ओलीको चीन भ्रमणको विषय पनि उल्लेख गरिएको छ । प्रधानमन्त्री ओलीको चीन भम्रणको तयारीका लागि ओली र देउवाको निर्देशनमा परराष्ट्रमन्त्री आरजु राणा देउवालाई जिम्मेवारी दिइएको संयन्त्र बनिसकेपछि जारी विज्ञप्तिमा बताइएको थियो ।
यद्यपि, सो संयन्त्र प्रधानमन्त्रीको भ्रमणका लागि नबनाइएको उपमहासचिव ज्ञवालीले बताए । उनले भने, ‘पहिलो कुरा राजनीतिक संयन्त्र प्रधानमन्त्रीको चीन भ्रमण सफल पार्नका लागि बनाइएको होइन ।
दुईवटा राजनीतिक दलहरूको बीचमा खासगरी सरकारको नीतिगत प्राथमिकता र संकल्प भनेर एउटा दस्तावेज तयार गरेका थियौँ,’ ज्ञवालीले सञ्चारकर्मीसँग भने, ‘सरकारले त्यसलाई आत्मसाथ गरेको छ ।
त्यसलाई सहजीकरण गर्ने र दुई दलबीच सहकार्य भइरहने वातावरणका लागि संयन्त्र बनेको हो । तत्कालका लागि महत्त्वपूर्ण एजेन्डा प्रधानमन्त्रीको चीन भ्रमण भएकाले त्यहाँ छलफल भयो । तर त्यही भ्रमणका लागि बनाइएको होइन।’
संयन्त्रको कार्यदलमा नेपाली कांग्रेसको तर्फबाट ४ र नेकपा एमालेको तर्फबाट ४ जना सदस्य रहेका छन् । जसमा कांग्रेस उपसभापति पूर्णबहादुर खड्का, गृहमन्त्री रमेश लेखक, महामन्त्री गगनकुमार थापा, परराष्ट्रमन्त्री आरजु राणा देउवा रहेका छन् । संयन्त्रको पहिलो बैठकले कार्यदलको संयोजन दुई दलले एक–एक महिना पालैपालो गर्ने उल्लेख गरिएको छ ।
